Украинд Оросын цэргийн тусгай ажиллагаа 17 дахь сар руугаа орж байгаатай холбогдуулан мэдээллийн тэнцвэртэй байдал хангах үүднээс украины Telegram Freeдом сайт, мөн Bloomberg ТВ, Украины ЕТГ-ын зөвлөх Михаил Подоляк, цэргийн командлалын хэвлэлийн төлөөлөгч Сергей Череватый, цэргийн эксперт Александр Мусиенко, Валерий Клочок нарын ярьснаас түүвэрлэн орчуулж сонирхуулъя. Энд sonin.mn сайтын байр суурь тусгагдаагүй болно. Украины фронтын байдал Орост таагүйгээр эргэсэн, ялагдаж шившгээ хутгахгүйн тулд энэ бүтэлгүй дайнаасаа мултран гарах бүхий л арга замыг сүвэгчилнэ. Владимир Путин ч өөрөө цэргээ хэрхэн татаж гаргах арга ухааны эрэлд гарчээ. Бүтэн жил хагас тэр тухай ганц ч үг амнаасаа гаргаагүй Путины хувьд одоо амаа үдүүлээд байх нь зохимжгүй тийм цаг үе иржээ. Бүтэн жил хагас ялалт хайгаад бүтсэнгүй, олон зуун мянгаар нь ОХУ-ын иргэдийг гавьяагүй үхэл рүү нь илгээлээ. Оросын Ерөнхийлөгч Украин дахь дайны тухай ярихаа зогсохгүй, гэхдээ тэр дайнаа дуусгана гэж ярьдаг болж байна. В.Клочокийн олж харснаар, Путинд өөрт нь зориулж бий болгосон суртал нэвтрүүлгийн машиндаа итгэхээ байжээ, тэр машин нь тасралтгүй ажиллахдаа Украин ба түүний цаадтайх АНУ, НАТО, Европыг харааж зүхэх, гутаах, доромжлох, гүтгэхээс өөр олигтой ажил хийсэнгүй, Оросын бүх ард түмнийг Украины эсрэг эх орны шинэ дайнд огтоос эрслэн босгож чадсангүй гэдгийг Путин ойлгохын цаагуур ойлгожээ. Украин дахь дайныг үргэлжлүүлэх хэрэгтэй гэдэг дээр оросын хүн амын маш өчүүхэн хэсэг зогсож байна, нийтээрээ “Одоо болиоч ээ” гэдэг дээр эвлэлдэн нэгдэж эхэлсэн, одоо зөвхөн Путины эцсийн шийдвэрийг чимээгүйхэн харж байна гэжээ. “Владимир Путины эрин үе” төгсгөлдөө орж буй, түүний дараа Орос даяар иргэний дайн дэгдэж магадгүй хэмээн Клочок сэрэмжлүүлэхдээ эрдэмтэн судлаач Игорь Рейтеровичээс эш татжээ.
Путин өөрөө зөвшөөрсөн байж магадгүй нэгэн нууц ажиллагаа Москва, Вашингтоны хооронд өрнөжээ. ОХУ-ын Гадаад тагнуулын алба, АНУ-ын Тагнуулын төв газрын дарга нарын хооронд мэдээлэл солилцож санал бодлоо илэрхийлсэн тухай, тэр нь Украины дайны тухай сэдэв байсан тухай мэдээлэл дэлхийн хэвлэл мэдээллээр цацагдав. Энэ тухай ОХУ-ын Гадаад тагнуулын албаны тэргүүн Сергей Нарышкин мэдээ задруулжээ. АНУ дахь партнёр Вильям Бернстэй энэ талаар ярилцжээ. Пригожины толгойлсон зэвсэгт үймээний хор уршгийг арилгаж байгаа тухай сэдэв эхлэн яригдаад дараа нь “Украины асуудал” руу орж ярьцгаажээ. Ярианы үндсэн сэдэв Украины эргэн тойрны үйл явдлын тухай өрнөсөн, Украинтай яавал дээр вэ гэдэг дээр байр сууриа илэрхийлсэн хэмээн Нарышкин ярьжээ. ОХУ-ын Гадаад тагнуул, АНУ-ын Тагнуулын төв газрын дарга нарыг “нууц хуйвалдаан” руу түлхсэн бодит шалтгаан мэдээж тодорхой. Украины зэвсэгт хүчин алгуурхан боловч амжилттай давшиж эхэлсэн, Орост зэвсэгт хүчний хувьчлал явагдаж Вагнер маягийн хувийн цэргийн компани хяналтаас гарах дээрээ тулсан, Оросын цөмийн зэвсгийн сан руу вагнерчууд орохыг завдсан, мөн Крымын гүүрийг хоёр дахь удаа дэлбэлсэн, ашиглах аргагүй болсон, дахин дэлбэлэхгүй гэсэн баталгаа байхгүй, оросын цэргүүд фронт дээр албадаад албадаад олигтой байлдаж өгөхгүй, харин ч олзлогдохыг илүүд үзэх болсон, энэ бүх асуудал Орос-Америкийн ярианы сэдэв болсон байж магадгүй байна. Хэрэв тиймдээ тулсан бол Орос нь олон улсын тавцанд шившгээ тарихгүйгээр АНУ-тай зохицож энэ дайнаасаа мултран гарах арга зам хайж байгаа нь гарцаагүй болох юм. Пригожины зэвсэгт үймээний дуулиан 14 тэрбум долларын (оросын ханшаар 1.3 их наяд рубль) “ашиг” Путинд өгсөн тухай Bloomberg ТВ верси гарган баримт түшин өгүүлэв. Пригожины “Вагнер ЧВК” арми Оросын нийслэлийг эзлэн авсан бол тэгэх ингэх байсан гэх таамаг агаарт уусан алга боллоо. Харин цэргийн зардлаа өсгөх, Москваг хамгаалах нэрээр “худалдан авалт” хийхэд нь Путиныг хүргэсэн ба төсвийн зардлаас 14 тэрбум доллар зарцуулна, түүгээрээ 2024 оны Ерөнхийлөгчийн сонгуулиар электоратыг худалдан авах авилгын зарим зардлыг босгоно гэж Bloomberg-ээр ярьжээ. “Нэмэлт зардал” нэрээр Оросын төсвөөс үлэмж хэмжээний мөнгө гаргах далим Пригожин гаргаад өгчээ. Москвад 200 км ойртож давшсан вагнерчууд замдаа огт сааталгүй, харин ч оросын иргэдээс үлэмж дэмжлэг хүлээж байсан нь ОХУ-ын дотоодод батлан хамгаалалт ямар ихээр суларсны гэрч болжээ. Иймд улс орныхоо дотоодод батлан хамгаалалтаа чангаруулах зардал хэрэгтэй. Бас нэг онцлох зүйл бол энэхүү зэвсэгт үймээн нь Путины нэр хүндийг электоратынх нь өмнө унагасан явдал юм. Путиныг дэмждэг гэх орос иргэдийн эзлэх хувь 74% байгаа гэсэн шинэ мэдээ гарчээ. Энэ нь 2022 оны намрын оргил үеэсээ эрс доошилсон үзүүлэлт аж. Электоратын дэмжлэг авахын тулд Украины фронт дээр ялна гэдэг үлгэр болсон. Кремлийн тэргүүний энэ баг олон улсын цэргийн гэмт хэрэгтний ялд уначихгүйн тулд эцсийн аргаа хэрэглэх хэрэгтэй, тэр нь 2024 оны гуравдугаар сард явагдах Ерөнхийлөгчийн сонгууль, түүний наана Орос дахь цалингийн доод хэмжээг 18.5% нэмэх хэрэгтэй, энэ нь дор хаяж 5 сая иргэнийг ядуурлаас нь татаж гаргана гэсэн үг. Ядуурсан, дайнд хүнээ явуулж алуулсан, дайны хэлмэгдэгч болсон олон сая иргэд Путиныг харан сууна. Bloomberg-ийн мэдээллээр бол, 2023 оны эхний хагаст ОХУ-д төсвийн алдагдал 2.6 их наяд рубль болж, зардлын 26% хаачсан нь мэдэгдэхгүй, 20% нь нийгмийн халамжинд зарцуулагджээ.
Ойрын өдрүүдэд гол сенсаац Крымын гүүр байх бололтой. М.Подолякийн үзэж байгаагаар саяхны дэлбэлэлтийг оросууд өөрсдөө хийсэн болж таарав. Энэ гүүрийг ингэж дэлбэлж гэмтээснээр оросууд дор хаяж 4 зорилт шийднэ гэж тооцоолжээ. 1. Терроризмын тухай сэдэв Орост хаданд гарна; 2. Эзэлж авсан газар нутагтаа оросын эрх баригчид иргэдээр амьд бамбай хийхийг чухалчилна; 3. Оросын дотоодод нийгмийн хүрээнд түрэмгийллээ дэмжүүлнэ; 4. Путины нэр хүнд унаж, “шалдан хаан” болж хувирч байгааг сарниулна, орос иргэдийн анхаарлыг өөр тийш нь эргүүлнэ гэжээ. Харин украины цэргийн шинжээч А.Мусиенко арай өөр дүгнэлттэй байна. Одоогоор оросууд Москваг хамгаалах гэхээсээ илүүтэй энэхүү гүүрийг үхэн хатан хамгаалж байгаа энэ үед түүн рүү шинэ атакласан нь украины армийн томхон амжилт болсон ба дахин ч халдах болно гэжээ. Керчийн хоолойн хоёр эргийн дагуухи районд оросууд агаарын довтолгооноос хамгаалах үлэмж зэвсэг, байлдааны хөлөг онгоц, катерууд бөөгнүүлсэн, бүр олон эгнээ хамгаалалтын зурвас буй болгосон, түүндээ асар их хөрөнгө хүч хаясан, Крымын гүүр бол Оросын хувьд цэргийн томхон объект, тэр объектоор асар их зэр зэвсэг, сум галт хэрэгсэл, шатах тослох материал зөөж байна, Өмнөд фронтын нийт ложистикийн 65-70% хийгддэг, иймд энэ гүүрийг дэлбэлсэн нь дайсанд маш том цохилт боллоо хэмээн Мусиенко ярьжээ. Украины зэвсэгт хүчний дорнод бүлэглэлийн спикер С.Череватыйн хэлснээр ОХУ нь 100 мянган цэрэг дайчлан зөвхөн Лиман-Купянскийн чиглэлд байлдуулж байна. Хоногтоо 7-10 удаа атаклах боловч тухай бүрт нь украины цэрэг хариуг нь өгч ухраана. Украины цэргийн байрлал руу хичнээн ч дайраад нэмэргүй болжээ. Череватыйн хэлснээр оросын 100 мянган цэрэгт нь 900 гаруй танк, 550 гаруй артиллерын систем, тийрэлтэт катюш 370 байгаа ба Лиман-Купянскийн чиглэл нь тухай цагийн Афганистантай адил түвшинд байна. Афганистаны дайны ид үед зөвлөлтийн армийн цэргийн тоо 120 мянгад хүрч байсан баримтыг Череватый дурджээ. Эдүгээ ОХУ-ын зэвсэгт хүчин сүүлчийн боломж, хүч нөөцөө дайчлан эцсийн горьдлого тээн Лиман-Купянск руу довтлох ба десантын ангиуд, мото-явган цэргийн шилдэг анги салбарууд, армийн нөөц, орон нутгийн цэрэг, хувийн цэргийн компани, мөн "Z" гэх дайрагч отрядыг оролцуулан украины хамгаалалтыг сэтлэхийг оролдон бүтэлгүй байлдсаар байна. Орос, англи хэлнээс түүвэрлэн хөрвүүлсэн Дүгэржавын Номиндарь
.jpg)
