- Энэ нь анх худалдаалагдаж байснаас бараг 320 дахин их үнэ юм
- Ингэснээр өмнө нь 63 мянган ам.доллароор зарагдаж байсан загварын рекордыг эвджээ
Apple компаниас гаргасан iPhone утасны хамгийн анхны, 4gb багтаамжтай загвар дуудлага худалдаагаар 190 мянган ам.долларт хүржээ.
Тус утсыг LCG дуудлага худалдааны газраас худалдсан бөгөөд анхны үнээс нь бараг 320 дахин ихээр борлуулсан байна. Ингэснээр өмнө нь 63 мянган ам.долларт хүрч байсан 8gb багтаамжтай загварын рекордыг эвджээ.
Анх гарахдаа 599 ам.доллароор худалдаалагдаж байсан тус утсыг үйлдвэрлэснээс нь хойш нэг ч задлаагүй аж. Борлуулагдсан утас нь тухайн үед Apple компанид ажилладаг байсан инженерийн ажилтных гэв.
2007 онд гаргаж байсан тус загварыг хоёр сарын дараанаас үйлдвэрлэхээ больсон юм. Учир нь хэрэглэгчид $100 доллар нэмж төлөөд хоёр дахин их буюу 8gb багтаамжтай загварыг нь түлхүү худалдан авдаг байжээ.
Одоогоор Apple компаниас гаргаж буй загваруудаас хамгийн үнэтэй нь нэг терабайтын багтаамжтай iPhone 14 Pro Max юм. Тус утасны эхлэх үнэ 1599 ам.доллар.
