Норвегийн Батлан хамгаалахын сайд лхагва гарагт Украинд 1000 микродрон, агаарын довтолгооноос хамгаалах NASAMS системд зориулсан тэжээл, эд ангиудыг өгнө гэж мэдэгдлээ.
Франс Пресс агентлагийн мэдээлснээр, сайд Бьорн Арилд Грам хэлэхдээ, шинэ багцад Black Hornet загварын микродрон, олон мянган цэргүүдийн хоол хүнс, NASAMS зенитийн пуужингийн системийн элементүүд багтах бөгөөд эдгээр нь Литвийн Украинд шилжүүлэх гэж буй хоёр системийг нөхөх болно.
Норвегийн засгийн газраас өмнөх өдөр нь зарласан нэмэлт тусламжийн багцад яг юу багтахыг Бьорн Арилд Грам ийнхүү тайлбарлав.
Энэ онд Украинд үзүүлэх тусламжийн хэмжээг 2,5 тэрбум крон (ойролцоогоор 220 сая евро)-аар нэмэгдүүлж, 10 тэрбум крон болгож байгаагаа тус улсын засгийн газар мэдэгдэв.
Литва 6-р сарын сүүлээр Украинд зориулж хоёр NASAMS систем худалдаж авахаа зарласан юм. Black Hornet микродрон бол ердөө 33 грамм жинтэй тагнуулын нисгэгчгүй төхөөрөмж бөгөөд цэргүүд биедээ авч явж байх үедээ байлдааны талбараас шууд хөөргөх боломжтой. Норвеги улс өнгөрсөн зун Украинд ийм дронуудын багцыг аль хэдийн хүлээлгэн өгсөн юм.
Эх сурвалж: ВВС
