Засгийн газрын өчигдрийн хуралдаанаар “Үндэсний их баяр наадмын үндэсний бөхийн бөхийн барилдааны дүрэм”-ийн өөрчлөлтийг баталсан байна. Тодруулбал тус дүрмийн 4.9, 4.10, 4.11, 4.12 дахь заалтуудад өөрчлөлтийг оруулжээ. Үүнд:
-Барьцгүй барилдааныг 20 минут байхаар болгосон байна. Хэрэв хоёр бөх санал нийлбэл барьц авч барилдаж болох бөгөөд энэ нь үндсэн хугацаанд үргэлжилнэ.
-Барьцгүй барилдаан дуусахад хаялцахгүй бол барьцтай барилдааныг 20 минут. Энэ нь сэнжиг элэг бүснээс давхар шуудаг хүртэл барьцыг авч барилдах юм.
-Барьцтай барилдаанд хаялцахгүй бол тэгш барьцаар 20 минут барилдана.
-Тэгш барьцнаас хаялцахгүй бол нийт 60 минутын бөхийн барилдааны идэвхийг харгалзаж, Хөлийн цэцүүдийн олонхын саналаар идэвхгүй бөхийг хасаж шийдвэрлэнэ.
Дээрх дүрмийн өөрчлөлтүүдийг Ардын хувьсгалын 102 жилийн ойн сум, аймаг, улсын баяр наадмын үндэсний бөхийн барилдаанд хэрэгжүүлж ажиллана гэдгийг Монголын Үндэсний бөхийн холбооноос мэдээллээ.
