Улс төрд нөлөө бүхий албан тушаалтнууд, төрийн өмчит болон өмчийн оролцоотой томоохон компаниудын удирдлагуудын АТГ-д мэдүүлсэн ХАСХОМ-ын мэдээллийг цувралаар танилцуулж байгаа билээ. Энэ удаа Улаанбаатар төмөр зам ХНН-ийн удирдлагуудын ХОМ-ын мэдээллийг хүргэж байна.
Улаанбаатар төмөр зам ХНН-ийн дарга Х.Хэрлэнгийн орлого 5 дахин нэмэгдсэн
Улаанбаатар төмөр зам ХНН-ийн дарга Х.Хэрлэн 2022 онд нийт 5.6 тэрбум төгрөгийн хөрөнгө, орлого мэдүүлсэн. Ингэснээр түүний нийт хөрөнгө, орлого жилийн хугацаанд 992.9 сая төгрөг буюу 21.2 хувиар өссөн байна.
Тэрээр 2021 онд 92.7 сая төгрөгийн өөрийн орлоготой гэж мэдүүлж байсан бол 2022 онд 492.6 сая төгрөг болж огцом 5 дахин нэмэгдсэн нь анхаарал татаж байгаа юм. Мөн дотоодын банк, санхүүгийн байгууллагад байршуулсан мөнгөн хадгаламж нь 2022 онд 280.3 сая төгрөгөөр нэмэгдэж, 1.44 тэрбум төгрөгийн хуримтлалтай болсон аж.https://flo.uri.sh/visualisation/14369424/embed
УБТЗ-ын дарга Х.Хэрлэн нийт 2.59 тэрбум төгрөгөөр үнэлэгдэх хоёр нийтийн орон сууц, нэг оффисын барилгатай. Туулах чадвар өндөр 600 сая төгрөгийн үнэ бүхий "Mercedes Benz G-500" маркын автомашинтай. 55 сая төгрөгөөр үнэлэгдэх эзэмших эрхийн 699м.кв, 700м.кв хоёр газартай. 425 сая төгрөгийн үнэт эдлэл, урлаг, түүхийн үнэт зүйлстэй. Герман цонх ХХК-ийн 50 хувь, Эйч Ти Эм ХХК-г 100 хувь эзэмшдэг.
Х.Хэрлэн Ашигт малтмал, газрын тосны газрын даргаар ажиллах хугацаандаа буюу 2018 онд 4.8 тэрбум, 2019 онд 5.06 тэрбум, 2020 онд 6.05 тэрбум, УБТЗ-ын даргаар томилогдсон 2021 онд 4.67 тэрбумын хөрөнгө, орлого мэдүүлж байв.https://flo.uri.sh/visualisation/14372804/embed
АТГ-ын удирдлагууд хөрөнгө орлого нь хөдөлмөрийн хөлсний доод хэмжээнээс 250 дахин өссөн, эсвэл буурсан албан тушаалтныг шалгах үндэслэл болдог талаар мэдээлсэн. Уг зарчмаар хөрөнгө, орлого нь жилийн дотор огцом нэмэгдсэн УБТЗ-ын Тээвэр зохион байгуулалтын албаны орлогч дарга асан С.Гандөлийг шалгах явцад гэрээс нь 7 тэрбум төгрөг бэлнээр илэрсэн байдаг. Өдгөө анхан шатны шүүхээс түүний гэм бурууг тогтоож 12 жилийн хорих ял оноосон.
Тиймээс УБТЗ-ын даргаар томилогдох үед хөрөнгө, орлого нь 1.37 тэрбум төгрөгөөр буурч, УБТЗ-ын даргаар ажилласан эхний жилдээ 992.9 сая төгрөгөөр хөрөнгө, орлого нь нэмэгдсэн Х.Хэрлэн даргыг АТГ анхааралдаа авах биз.
