УИХ-ын нэр бүхий гишүүдээс Хөрөнгө оруулалтын тухай хуулийн төсөлтэй хамт Газрын тухай хуульд нэмэлт өөрчлөлт оруулах тухай хуулийн төслийг эсэргүүцэн Иргэний нийгмийн байгууллагын төлөөлөл мэдэгдэл хийлээ.
УИХ-ын гишүүн С.Ганбаатар, "Гадаадын хөрөнгө оруулалтыг бид зөв ойлгож, дэмжих ёстой. Тэд мөнгөө оруулаад хариуд нь ашгаа авч болно. Тэд мэдлэгээ хуваалцаж болно. Харин монголчуудын газрын авна гэдэг бол аюултай. Улс хүн, газар хоёроос бүтдэг. Улсын үндэс газрыг хамгаалж, үр хүүхдүүддээ өвлүүлэх ёстой гэлээ. Газрын тусгаар тогтнол, Монголын ирээдүйн төлөө бид өнөөдөр тууштай энэ дээр хатуу байна гэдгээ би илэрхийлж байна" гэлээ. НИТХ-ын төлөөлөгч Т.Батцогт "Ард иргэд баяр наадмын уур амьсгалтай байхад МАН хулгайгаар хууль баталдаг уламжлалтай болсон байна. Ард иргэд сохроогүй, дүлий биш. Бид харж байна, ажиглаж байна. МАН Газрын тухай хуулийг шинэчлэх нэртэйгээр оруулж ирлээ. Зорилго нь гадны хөрөнгө оруулалтыг татах гэнэ. Монголд гадаадын хөрөнгө оруулалт хангалттай байна. Гэтэл иргэдийн амьдрал сайжирсан юм уу. Харин эсрэгээрээ МАН-ын эрх баригчид, тэднийг дагаж буй цүнх баригчдын амьдрал ахуй сайжирсан. Бэлчээрийн мал аж ахуй цөлжилт бий болгож байна гэдэг халхавчин дор Монгол Улсын газар нутгийг харийнханд худалдах гэж байгаа үйлдлийг таслан зогсоох ёстой. Бид газар нутгаа харийнханд алдах ёсгүй. Үүний эсрэг хатуу тэмцэнэ. Газар нутгийнхаа бүрэн бүтэн байдлыг хадгалахад анхаарал сэрэмжтэй байхыг ард түмэнд уриалж байна" гэлээ.
