Хүүхдийн хамгаалуулах эрхийн хэрэгжилтийг хангах зорилгоор УИХ-аас хяналтын сонсгол хийсэн. Энэ үеэр хүүхдийн эсрэг үйлдэгдэж буй гэмт хэргийн талаар ЦЕГ-аас гишүүдэд мэдээлэл өгсөн юм.
Цагдаагийн ерөнхий газрын Гэр бүлийн хүчирхийлэл хүүхдийн эсрэг гэмт хэрэгтэй тэмцэх хэлтсийн дарга, цагдаагийн хошууч Г.Мөнхбаяр "2023 оны эхний хагас жилд хүүхдийн эсрэг үйлдэгдсэн 960 гэмт хэрэг гарч 990 хүүхэд хохирсон. Тэдний 33 нь нас барж, 364 хүүхэд гэмтсэн. Мөн гэр бүлийн хүчирхийллийн 717 гэмт хэрэг үйлдэгдэж зургаан хүүхэд холбогдож, 77 хүүхэд хохирсноос 3 хүүхэд нас барж, 44 нь хүүхэд гэмтжээ. Сураггүй алга болсон гэх 599 хүүхдийг цагдаагийн байгууллага эрэн сурвалжлилж, 585 хүүхдийг олж тогтоон, ар гэр, асран хамгаалагчид нь хүлээлгэж өгсөн байна.
Улсын хэмжээнд гэр бүлийн хүчирхийллийн хохирогч хамгааллын 21 түр байр, 14 нэг цэгийн үйлчилгээний төв ажиллаж, 2023 оны эхний зургаан сарын байдлаар 960 иргэнд үйлчилсний 148 нь насанд хүрсэн эмэгтэй, 811 нь хүүхэд, нэг нь насанд хүрсэн эрэгтэй байна" гэлээ.
