Вагнерийн ангиудыг татан авсны дараа үүссэн хүн хүчний хомсдолыг нөхөхийн тулд Орос улс Украинд Чечений олон отряд болон хоригдлуудыг илгээхээр бэлтгэж байна гэж Bloomberg Европын тагнуулын эх сурвалжаас иш татан мэдээлэв.
Эх сурвалжийн мэдээлснээр Орос улс олон сар тулалдсаны эцэст вагнерчуудад эзлэгдсэн Бахмут руу олон тооны анги нэгтгэлүүдийг шилжүүлсэн байна. Ингэснээр Украины өмнөд хэсгийн эзлэгдсэн бүс нутгуудын хамгаалалт мэдэгдэхүйц суларсан.
"Вагнер" явсан нь Украин дахь дайны явцыг өөрчлөхгүй гэж таамаглаж байгаа ч Путин цэргийн бүрэн дайчилгаанаас зайлсхийж буй нь Орос ойрын долоо хоногт чечений илүү олон отряд түүнчлэн хоригдлуудыг фронтын шугам руу илгээх төлөвтэй байна гэж Европын албаны хүмүүс мэдэгдсэн байна.
ОХУ-ын Аюулгүйн Зөвлөлийн орлогч дарга Дмитрий Медведев мягмар гарагт хэлэхдээ, 1-р сарын 1-ээс 7-р сарын 4 хүртэл 185 мянга гаруй хүн Оросын армид элссэн. Зэвсэгт бослого гаргах оролдлого нь тусгай ажиллагааны бүсэд гэрээт алба хаах иргэдийн хандлагыг өөрчилсөнгүй" гэжээ. Медведевийн хэлснээр, зөвхөн сүүлийн долоо хоногт бараг 10 мянган хүн гэрээ байгуулсан байна. Гэвч эдгээр тоо баримтыг баталгаажуулах боломжгүй гэж Bloomberg тэмдэглэв.
Батлан хамгаалах яам хоригдлуудыг элсүүлдэг Вагнерийн туршлагыг хэрэгжүүлж тэдний арми дахь тоог 15 мянга хүртэл нэмэгдүүлсэн гэж Европын албаны хүмүүс үзэж байна. Энэ тоо улам өсөх магадлалтай. "Штурм Z" гэж нэрлэгддэг торгуулийн ангид 2 мянга орчим хоригдол алба хааж байна.
Чечень хэдэн цэрэг нэмж өгөх нь тодорхойгүй байгаа ч Бүгд найрамдах улсын тэргүүн Рамзан Кадыров өнгөрсөн тавдугаар сард Чечений 7000 орчим цэргийн албан хаагч Украинд байгаа бөгөөд 2400 гаруй цэргийг Батлан хамгаалах яамны хоёр шинэ ангид сургаж байгаа гэж мэдэгджээ.
Эх сурвалж:ВВС
