"Вагнер"-ийн зэвсэгт бослогын дараа Санкт-Петербург дахь түүний оффис, тээврийн хэрэгсэлд нэгжлэг хийх үеэр хураан авсан 10 тэрбум рубль, зуун мянган доллар болон таван гулдмай алтыг Евгений Пригожинд буцааж өгчээ.
Долдугаар сарын 2-ны орой хууль сахиулах байгууллагынхан ийм шийдвэр гаргасан гэж эх сурвалж мэдээлжээ. Пригожин тэр үед Москвад байсан тул хураагдсан мөнгө, үнэт эдлэлээ авахаар ирээгүй байна. Харин оронд нь итгэмжлэгдсэн жолооч нь мөнгийг авахаар иржээ. Эх сурвалжийн тэмдэглэснээр Пригожинд таван мянгатын дэвсгэртээр буцааж өгсөн мөнгөний нийт жин хоёр тонн хүрсэн гэнэ.
Зургадугаар сарын 24-нд зэвсэгт бослогын дараа Санкт-Петербург дахь Пригожинийн оффис, машинуудад нэгжлэг хийсэн юм. Энэ үеэр хүчний байгууллагынхан "Треззини палас" зочид буудлын хашаан дахь "Газель" маркийн машинаас 4 тэрбум рубль олсон бол мөн "Ривер Палас" зочид буудлын газар доорх зогсоолд микроавтобуснаас дахин 6 тэрбум рубль илрүүлж хураан авчээ.
Пригожин өөрөө их хэмжээний мөнгөтэй холбоотой гэдгээ үгүйсгээгүй. “Миний эзэмшилд байдаг "Газель" автомашин болон хоёр автобусаас мөнгө олдсон. Энэ нь цалин хөлс олгох болон "Груз 200" нөхөн олговорын мөнгө байсан "гэж Пригожин тайлбарлав.
Үүнээс өмнө ОХУ-ын Ерөнхийлөгч Владимир Путин “бослогод оролцоогүй” хөлсний дайчдыг Батлан хамгаалах яамтай гэрээ байгуулах, төрөл төрөгсөддөө буцаж очих эсвэл Беларусь руу явах хэд хэдэн сонголтыг санал болгоод буй юм.
Эх сурвалж: Мoscowtimes.ru
