Хөгжлийн банкны шүүх хурал сар гаруй үргэлжилж өчигдөр улсын яллагчид гэм буруутайд тооцсон этгээдүүдэд оноох ял шийтгэлийн саналаа шүүхэд танилцуулсан.
Хөгжлийн банкны хэрэгт холбогдоод байсан УИХ-ын гишүүдээс ганцхан Ё.Баатарбилэгийг гэм буруутайд тооцож, улсын яллагч зургаан жилийн хорих ял оноох саналыг шүүхэд танилцуулсан юм.
Хэрвээ шүүх Ё.Баатарбилэг гишүүнд хорих ял оноовол УИХ түүнийг эгүүлэн татах хуулийн зохицуулалттай.
Үндсэн хуулийн 29 дүгээр зүйлд Улсын Их Хурлын гишүүн бүрэн эрхээ хэрэгжүүлэхдээ өргөсөн тангаргаасаа няцаж Үндсэн хууль зөрчсөн бол түүнийг Улсын Их Хурлын гишүүнээс эгүүлэн татах үндэслэл болно. Улсын Их Хурлын гишүүн гэмт хэрэгт холбогдсон тухай асуудлыг Улсын Их Хурлын чуулганаар хэлэлцэж, бүрэн эрхийг нь түдгэлзүүлэх эсэхийг шийдвэрлэнэ. Уул гишүүн гэмт хэрэг үйлдсэн гэж шүүх тогтоовол Улсын Их Хурал түүнийг гишүүнээс нь эгүүлэн татна гэж заажээ.
Мөн УИХ-ын тухай хуулийн 10.2-т УИХ-аас гишүүнийг эгүүлэн татах тогтоол гаргана гэж заажээ. Гишүүн гэмт хэрэг хийсэн нь шүүхийн хүчин төгөлдөр шийтгэх тогтоолоор тогтоогдсон тохиолдолд гишүүнийг чөлөөлөх, эгүүлэн татах асуудлыг Төрийн байгуулалтын байнгын хорооны санал, дүгнэлтийг үндэслэн нэгдсэн хуралдаанаар хэлэлцэж,
10.1.6-д заасан асуудлаар гишүүн саналаа илээр гаргана. Хуралдаанд оролцсон гишүүдийн олонх гишүүнийг чөлөөлөх, эгүүлэн татахыг дэмжсэн бол энэ тухай тогтоол баталсанд тооцно гэж заажээ.
Парламентын түүхэнд анх удаа бүрэн эрхийнхээ хугацаанд шүүхээс ял шийтгүүлэх анхны тохиолдол энэ болох аж. Тиймээс анхан шатны шүүхийн шийдвэрийг үндэслэж Их хурлын гишүүнээс эгүүлэн татах уу, эцсийн шатны шүүхийн шийдвэрийг хүлээх үү гээд олон асуудал ойлгомжгүй байгаа юм.
Мөн Үндсэн хуульд УИХ-ын гишүүнийг шүүхээс гэм буруутайд тооцож, ял оноовол гишүүнээс эгүүлэн татна гэж заасан хэрнээ УИХ-ын тухай хуульд Төрийн байгуулалтын байнгын хороо хуралдаж илээр санал хураана гэж заажээ. Хэрвээ санал хураалтаар гишүүдийн олонх бүрэн эрхийг нь түдгэлзүүлэхийг дэмжихгүй бол яах вэ гэдэг асуудал ч тодорхой бус байна.
Ямартай ч шүүхээс Ё.Баатарбилэг гишүүнд ял оноож, тус шийдвэрээ УИХ-ын Төрийн байгуулалтын байнгын хороонд бичгээр ирүүлэх юм. Ингээд Төрийн байгуулалтын байнгын хороо уг саналыг нээлттэй хэлэлцэж, илээр санал хураалт явуулна. Хэрвээ анхны шатны шүүхийн шийдвэрийг үндэслэнэ гэвэл түүнийг хугацаанаас нь өмнө эгүүлэн татах бол эцсийн шатны шүүхийн шийдвэрийг үндэслэвэл бүрэн эрхийнх нь хугацаанд эгүүлэн татах боломжгүй болох юм.
