Өнөөдөр Нийслэлийн ИТХ-ын ээлжит XIX хуралдаан болж Нийслэлийн 2022 оны төсвийн гүйцэтгэл батлах тухай, Нийслэлийн 2023 оны төсөвт өөрчлөлт оруулах тухай асуудлыг хэлэлцэж байна.
Хэлэлцэж буй асуудлуудтай холбогдуулан НИТХ дахь АН-ын бүлгийн дарга Б.Эрдэнэсүх байр сууриа илэрхийллээ.
Тэрбээр “Нийслэлийн төсөвт хийсэн аудитын дүгнэлтийг авч үзвэл 2021 онд 1.6 тэрбум төгрөг, 2022 онд 805.1 сая төгрөгийг зориулалтын бусаар үр ашиггүй зарцуулсан байна. Шилэн дансандаа 2021 онд 79.2 тэрбум төгрөгийн, 2022 онд 125.4 тэрбум төгрөгийн гүйлгээг ил тод байршуулаагүй.
Төрийн байгууллагын ажил олгогч буюу дарга нарын буруугаас ажлаас халагдсан ажилтнуудад нийслэлийн төсвөөс 2021 онд 288.9 сая төгрөг, 2022 онд 309 сая төгрөгийг тус тус олгосон. Эндээс нийслэлийн төсвийг бодлогогүй, үрэлгэн зарцуулж, төрийн албаны бүтцийг хэт данхайлгасан албан тушаалтанд хариуцлага тооцох тогтолцоогүй байгаа нь харагдаж байна.
Нийслэлийн төсвийн орлогын 80-90 хувийг татвар болон хүү, торгуулийн орлого эзэлдэг. Иргэд амьдрах орчноо сайжруулж, сайн сайхан амьдрах гэж татвар төлдөг. Гэвч энэ мөнгийг иргэдийн сайн сайхны төлөө зарцуулж чадахгүй байна.
Нийслэлийн төсвийн орлогын төлөвлөгөө тасарсан байхад зардлаа нэмэхээр төсвийн тодотгол оруулж ирж байгаад харамсаж байна. Иймд нийслэлийн харьяа байгууллагуудын үйл ажиллагааны болон урсгал зардлыг үндэслэлгүй нэмж оруулж ирснийг хасах саналтай байна. Үүнд Нийслэлийн байгаль орчны газрын үйл ажиллагааны зардлыг 2.1 тэрбумаар баталсан ч 3.1 тэрбум болгож нэг тэрбум төгрөгөөр нэмж буй хасах. Бодлогын судалгаа шинжилгээний төвийн төсвийг 1.9 тэрбумаар баталсныг 4.2 тэрбум болгож огцом нэмснийг хасах, Улаанбаатар хөгжлийн корпорацын зардлыг 1 тэрбумаар нэмснийг хасахыг тус тус саналтай байна" гэлээ.
