"Вагнер"-ийн үүсгэн байгуулагч Евгений Пригожины бослогын дараа сураггүй алга болж холбоо тасраад байгаа Украин дахь цэргийн нэгдсэн бүлгийн дэд командлагч, армийн генерал Сергей Суровикинтэй холбоотой нөхцөл байдлын талаар Кремль тайлбар хийхээс татгалзав.
ОХУ-ын Ерөнхийлөгч Владимир Путин юуны түрүүнд Батлан хамгаалах яам, Жанжин штабын дарга нартай л шууд харьцаж ажилладаг. Тиймээс Яамны бүтцийн нэгжийн талаарх асуултаа яаманд хандаж тавихыг зөвлөж байна. Энэ бол Батлан хамгаалах яамны бүрэн эрх" гэж Ерөнхийлөгчийн хэвлэлийн нарийн бичгийн дарга Дмитрий Песков 6-р сарын 29-ний пүрэв гарагт болсон хэвлэлийн бага хурал дээр ийн мэдэгдэв.
Суровикин Оросын армийн хамтарсан бүлгийн дэд командлагчийн албан тушаалаас огцрох магадлалтай байгаа тухай хэвлэлүүдийн мэдээний хүрээнд энэ асуултыг тавьсан гэжээ.
Батлан хамгаалах яамны хоёр эх сурвалж лхагва гарагт The Moscow Times сонинд Суровикиныг "баривчилсан" гэж мэдэгдсэн юм. Тэрээр 6-р сарын 24-нд Вагнерийн бослогын дараа удалгүй алга болсон гэх мэдээлэл байгаа юм.
Суровикиныг Герасимовын оронд Зэвсэгт хүчний Жанжин штабын дарга болж магадгүй гэсэн мэдээллийг ОХУ-ын хэд хэдэн хэвлэл мэдээлж байсан юм.
Өмнө нь Суровикиныг Вагнер-ийн үүсгэн байгуулагч Евгений Пригожин бослогод бэлтгэж байгааг мэдэж байсан гэсэн мэдээллийг Кремль няцаасан юм. "Одоо эдгээр үйл явдлын эргэн тойронд янз бүрийн таамаглал, хов жив гэх мэт олон цуурхал гарах болно. Энэ бол үүний нэг жишээ гэж би бодож байна” гэж ОХУ-ын Ерөнхийлөгчийн хэвлэлийн төлөөлөгч Дмитрий Песков хэлэв.
"Эхо Москвы"-гийн ерөнхий ректор асан Алексей Венедиктов Суровикинтэй гурван өдрийн турш холбоо барьж чадаагүй бөгөөд түүний хамгаалагчид ч хариу өгөхгүй байна гэж хэлэв.
Эх сурвалж: Мoscowtimes.ru
