Цагдаагийн байгууллагаас Архангай аймгийн Эрдэнэмандал сумын нутагт байрлах "Хасу шивэрт" амралтын газарт эмч Г нас барсан гэх асуудалд хохирогчийн талаас хэвлэлийн хурал хийсэнтэй холбогдуулан прокурорын зөвшөөрсөн хэмжээнд мэдээлэл хүргэлээ.
Мэдээлэлд "2022 оны долоодугаар сарын 9-ний өдөр Архангай аймгийн "Хасу шивэрт" амралтын газарт хүн нас барсан гэх дуудлага ирсэн. Дуудлагын дагуу аймгийн цагдаагийн газрын албан хаагчид очиж мөрдөн шалгах ажиллагаа явуулсан. Мөрдөн шалгах ажиллагаа явуулж, Архангай аймгийн шүүхийн шинжилгээний газрын шинжээч эмч дүгнэлт гаргасан. Мөрдөн шалгах ажиллагааг Улсын ерөнхий прокурорын тушаалаар баталсан журмын дагуу тус мөрдөн байцаах албанд харьяалал тогтоон мөрдөн шалгах ажиллагаа явуулж байгаа.
Шүүхийн шинжилгээг дахин хийлгэх хүсэлтийг хохирогчийн талаас гаргаж, хүсэлтийг хангаж 3 эмчийн бүрэлдэхүүнтэй шинжээчийн дүгнэлт гарсан. Тухайн дүгнэлтийг мөн эс зөвшөөрч дахин бүрэлдэхүүнтэй шүүхийн шинжилгээ хийлгэх хүсэлт гаргасан. Энэ хүсэлтийг Шүүхийн шинжилгээний ерөнхий газраас 2, Эрүүл мэндийн яамнаас 5 нийт 7 хүний бүрэлдэхүүнтэй шинжээчийг томилон ажиллаж байна.
