Украин дахь Оросын цэргийн хамтарсан бүлгийн дэд командлагч, генерал Сергей Суровикиныг баривчилжээ. Энэхүү мэдээллийг "The Moscow Times" сонинд БХЯ-ны аппаратад ойр хоёр эх сурвалж өгсөн байна. Одоогоор энэ мэдээлэлд албан ёсоор тайлбар хийгээгүй байна. Сануулахад, түүнийг Герасимовын оронд Жанжин штабын дарга болох магадлалтай хүн хэмээн Оросын хэвлэлүүд нэрлэж байсан юм.
Эх сурвалжуудын нэгний хэлснээр "Түүний бүх үйлдэл "ОК" байж чадаагүй. Эрх мэдлийн төлөө. Би өөр зүйл хэлж чадахгүй” гэж баривчлах болсон шалтгааныг тайлбарлажээ.
“Суровикин бослогын үеэр Пригожины талыг сонгосон бололтой" гэж өөр нэг эх сурвалж тодотгожээ. Генералыг одоо хаана байгааг асуухад "Бид энэ мэдээлэлд тайлбар өгөхгүй" гэж хариулсан байна
Суровикиныг баривчилсан тухай мэдээллийг цэргийн блогч Владимир Романов анх нийтэлсэн. Түүний хэлснээр генералыг Евгений Пригожины бослогын маргааш буюу зургадугаар сарын 25-нд баривчилжээ.
"The Moscow Times" сонины эх сурвалжийн мэдээлснээр, Суровикин Пригожинийн бослогыг мэдэж байсан эсэх нь бүрэн тодорхойгүй байна.
Тэрээр "Гурван өдрийн турш гэр бүлийнхэнтэйгээ холбоо бариагүй" гэж "Эхо Москвы" сонины ерөнхий редактор асан Алексей Венедиктов бичжээ. Түүний хамгаалагчид ч хариу өгөхгүй байна.
Суровикин Оросын цэргийн удирдлагын эсрэг зэвсэгт бослого гаргах төлөвлөгөөний талаар урьдаас мэдэж байсан гэж "The New York Times" өмнө нь АНУ-ын тагнуулын албанаас иш татан мэдээлсэн байна.
Суровикин ерөнхийлөгч Владимир Путины 23 жилийн дэглэмд хамгийн ноцтой аюул заналхийлсэн үймээн самууныг төлөвлөхөд тусалсан эсэхийг одоо олж тогтоохоор ажиллаж байна гэжээ.
Эх сурвалж: Moscowtimes.ru
