Монголын хүүхдийн спортын зуны VII наадам зургаадугаар сарын 19-29-ны өдрүүдэд Баянхонгор аймагт явагдаж байна. Тус наадмын боксын 46 килограммын жинд Хан-Уул дүүргээс төлөөлөн оролцсон Азжаргалын Амина бүх өрсөлдөгчөө цаг дуусахаас өмнө ялж, алтан медаль хүртлээ.
14 настай А.Амина боксын спортоор хичээллээд нэг жил, долоон сар болж буй. Энэ зуурт тэрээр 12 тэмцээнд дараалан алтан медаль хүртсэн шилдэг амжилтад хүрээд байна.
Тэрээр өнгөрсөн онд өсвөр үеийн УАШТ-д түрүүлж, энэ оны дөрөвдүгээр сард болсон Залуучуудын УАШТ-д дээд насны тамирчидтай өрсөлдөн алтан медалийг хүртсэн юм.
Түүнийг Нисэхийн VII сургуулийн биеийн тамирын багш Э.Гаваа гардан бэлддэг аж. Түүнийг “Бээжин-2008” олимпийн мөнгөн медальт, боксын анхны дэлхийн аварга, хөдөлмөрийн баатар, гавьяат тамирчин П.Сэрдамбатай ижил төстэй техниктэй хэмээн боксын мэргэжилтнүүд хэлдэг гэнэ. Өөрөө ч Сэрдамбыг хүндэлж биширч түүн шиг мундаг боксчин болох зорилготой юм байна.
