- Пригожины жагсаал Оросын удирдагчийг онилох зорилгогүй байсан гэв
- Вагнерын цэргүүдийг тарааж Батлан хамгаалах яаманд нийлүүлэх шийдвэрийг цэргүүд эсэргүүцсэн
- Оросын онгоцыг унагасандаа харамсаж буйгаа Пригожин мэдэгдэв
Шударга ёсны төлөөх тэмцэл гэх жагсаалыг эхлүүлсэн Евгений Пригожинтой Беларусийн ерөнхийлөгч Александр Лукашенко утсаар холбогдож зөвшилцсөн. Улмаар Пригожин Москва руу чиглэж байсан цэргүүдээ эргүүлэн татах шийдвэрт хүрч, хэлэлцээрийн үр дүнд түүнийг Беларусь руу илгээхээр болсон юм. Уг мэдэгдлээс хойш Пригожины хаана байгаа нь тодорхойгүй байгааг хэвлэлүүд мэдээлж байсан.
Тэгвэл Пригожин өнгөрсөн шөнө 11 минутын урттай бичлэгээрээ дамжуулан зэвсэгт бослогоо өндөрлүүлсний дараах анхны мэдэгдлээ хийлээ. Тэрбээр бичлэгтээ “Бидний жагсаал Оросын удирдагчийг онилох бус Вагнер бүлгэмийг устахаас сэргийлэх, ажлаа хийж чадаагүй албан тушаалтнуудад хариуцлага тооцох зорилготой байсан” хэмээн мэдэгдэв.
Мөн Вагнер хувийн цэргийн компанийг долоодугаар сарын 1 гэхэд тарааж цэргүүдийг нь Батлан хамгаалах яаманд нэгтгэх шийдвэр хэлэлцэгдэж байсан ч цэргүүд нь үүнийг эсэргүүцсэн байна. Оросын халдлагаар Вагнерын 30 цэрэг амиа алдсаныг дурдсан.
Пригожин “Беларусийн ерөнхийлөгч Александр Лукашенко надад гараа сунгаж, Вагнер компани хууль ёсны дагуу ажлаа үргэлжлүүлэх арга замыг хайхад тусална гэсэн" хэмээн ярьжээ.
Пригожин бичлэгтээ хаана байгаагаа хэлээгүй ч Беларусь руу явахыг зөвшөөрсөн нь үнэн гэдгээ дурдсан. Мөн “Оросын онгоцыг унагасандаа харамсаж байна. Гэхдээ тэд бидэн рүү пуужин, тэсрэх бөмбөг онилж байсан” гэдгийг онцлов.
Эх сурвалж: ВВС
