"Вагнер"-ийн үүсгэн байгуулагч Евгений Пригожин Оросын армийн удирдлагатай ноцтой сөргөлдөөнд удаан хугацаанд бэлтгэж байсан боловч түүний зорилго тодорхойгүй хэвээр байв. Украин дахь хөлсний цэргүүд Оросын хил рүү ойртож байгааг тусгай албаныхан урьдчилан мэдэж байсан. Тэнд бас зэвсэг, сум хэрэгслээ базааж зөөвөрлөж байсан гэжээ.
Пригожин Украинд ажиллагаа явуулахад сум байхгүй гэж мэдэгдснийг санаатай ташаа мэдээлэл гэж Вашингтон үзэж байна. Үүний зэрэгцээ үйл явдал маш хурдан өрнөж, Пригожин Оросын армийн эсрэг юу хийх, цэргээ хааш нь илгээж болохыг тодорхойлоход хэцүү байсныг CNN-ийн эх сурвалж тэмдэглэв. Нөхцөл байдлын хурдан өрнөл Америкийн өндөр албан тушаалтнуудыг гайхшруулсан бөгөөд энэ нь тэднийг төлөвлөсөн олон улсын аялалаа цуцалж, засгийн газрын хэмжээнд яаралтай хурал зарлахад хүргэжээ.
Владимир Путин ч Пригожин ямар нэгэн зүйл хийх гэж байгааг урьдчилан мэдэж байсан гэж Washington Post сонины эх сурвалж тэмдэглэжээ. Үүнийг мэдсээр байж тэр яагаад юу ч хийгээгүйг хэлж мэдэхгүй байна гэжээ.
Америкийн Дайны Судлалын Хүрээлэн энэ бослого нь Пригожин Вагнер-ыг Оросын Батлан хамгаалах яамны гадна бие даасан хүчин байлгах гэсэн цорын ганц арга зам байж болох юм гэжээ. Гэсэн хэдий ч шинжээчид түүнийг өөрийн чадвараа хэт үнэлсэн гэж үзэж байна.
Беларусийн Ерөнхийлөгч Александр Лукашенкогийн зуучлалаар байгуулсан гэрээ нь Пригожинийн удирдлаган дор "Вагнер"-ийг бие даасан тоглогчийн хувьд устгахад хүргэж болзошгүй гэж үзэж байна. Пригожины бослогын гэмт хэргийн ялыг хүчингүй болгосны хариуд тэр хөлсний армийн хяналтаа алдаж магадгүй юм. Хөлсний цэргүүдийн хувь заяа цаашид ямар байх нь одоогоор тодорхойгүй байна.
Түүнчлэн Батлан хамгаалахын сайд Сергей Шойгу, Жанжин штабын дарга Валерий Герасимов нарын талаар Владимир Путины байр суурь тодорхойгүй байгааг шинжээчид онцолж байна. Цэргийн аливаа өөрчлөлт нь зөвхөн ерөнхийлөгчийн бүрэн эрх бөгөөд өчигдрийн хэлэлцээгээр бараг яригдаагүй гэж Кремлийн хэвлэлийн төлөөлөгч Дмитрий Песков тодотгов.
Мөн Вагнерийн арми Оросын Батлан хамгаалах яамтай хамтран ажиллахад бэлэн эсэх, Оросын арми цаашид хөлсний цэргүүдтэй мөр зэрэгцэн ажиллах боломжтой эсэх нь тодорхойгүй байгааг мэргэжилтнүүд онцолж байна.
Эх сурвалж: Мoscowtimes.ru
