Оросын "Вагнер" хөлсний цэргийн эзэн Пригожины БХЯ-ны удирдалгуудтай үүссэн зөрчилдөөний улмаас тун ээдрээтэй нөхцөл байдал үүссэн. Хувийн цэргийнхэн Ростов на Дону хот дахь Оросын армийн өмнөд цэргийн тойргийн байрыг эзэлж, улмаар хот руу орох гол замыг минажуулж байгаа тухай мэдээлсэн.Түүнчлэн БХЯ-ны хоёр ч нисдэг тэргийг буудаж унагасан, хотын төвд хэд хэдэн удаа дэлбэрэлт болсон тухай зарим эх сурвалжийн мэдээнд дурдсан.
Болсон нөхцөл байдалтай холбоотойгоор Ерөнхийлөгч Путин ард түмэндээ хандаж мэдэгдэл хийх үеэрээ Пригожиныг урвагч хэмээн нэрлэж, хатуу хариуцлага тооцохооо мэдэгдэв. Гэвч хэрэг явдлын хурцадмал байдлыг Белорусийн ерөнхийлөгч Лукашенкогийн Пригожинтой хийсэн хэлэлцээр зөөллөж, асуудлыг зэвсгийн хүчээр бус яриа хэлэлцээрээр шийдэх тохиролцоонд хүрчээ.
Энэ хүрээнд Пригожинд үүсгэсэн эрүүгийн хэргийг хүчингүй болгож, Вагнерийн цэргүүд БХЯ-тай гэрээ байгуулах тухай яригдаж байна.
Харин Вагнерчууд хүн хүчний хэр хэмжээний нөөцтэй, ямар зэвсэг техниктэй талаарх мэдээлэл тун хомс байсан нь энэ хэрэг явдлын дараа нэлээд тодорхой болж байна. Пригожин "Бослого" дэгдээж байх үеэрээ амиа өгөхөд бэлэн 25 мянган дайчид байна. Цаана нь ахиад мөн өдий тооны дайчид бий гэж хэлсэн. Өөрөөр хэлбэл түүний хувийн цэргийн байгууллага наанадаж 50 мянга орчим дайчидтай гэсэн үг юм.
Вагнерийн цэргүүд Ростов на Дону хотыг орхин гарч байгаа тухай мэдээлэл өчигдөр цахим орчинд түгсэн. Тэнд тус хотоос гарч байгаа Вагнерийн техник зэвсэглэлийн талаарх нэлээд нарийвчлалтай тоо дурдагджээ. Түүнийг тоймловол:
6-р сарын 24-ний бямба гаригт "Вагнер" хувийн цэргийн компанийн мянга гаруй техник хэрэгсэл Воронеж мужаар дамжин Москва руу хөдөллөө. Нийслэл рүү зорчиж буй тээврийн хэрэгслийн тоог "Baza" өөрийн Telegram сувагтаа нийтэлжээ.
Тэнд дурдснаар 6-р сарын 24-ний шөнө дундаас хойш Воронеж мужийн хилийг давсан Вагнерийн эхний цуваанд есөн танк, "Тигр" хуягт машин дөрөв, түүнээс гадна их буу, "Град" пуужингийн систем (РСЗО) болон хэдэн арван ачааны машин, хэдэн зуун суудлын машин зэрэг 350 орчим техник хэрэгсэл багтжээ.
Дараа нь өглөөний 5 цагийн орчимд 375 орчим техник хэрэгсэл бүхий илүү том цуваа Воронеж муж руу чиглэн Оросын Батлан хамгаалах яамны цэргийн нисэх онгоцны буудал байрладаг Бутурлиновка хотыг чиглэсэн. Хоёр цагийн дараа гурван танк, зенитийн хоёр буу зэрэг 100 орчим техник хэрэгслээс бүрдсэн өөр нэг цуваа тус бүсийн хилийг давсан гэжээ.
Үүний дараа 212 техник хэрэгсэл бүхий дөрөв дэх цуваа өглөөний 9 цагийн үед Воронеж мужийн нутаг дэвсгэрт нэвтэрсэн байна.
Вагнерийн сөнөөгч онгоцууд Ростов-на-Дону хотод харагд сан гэж гэрчүүд мөн мэдээлжээ.
Эх сурвалж: Лента болон бусад
