УИХ-ын чуулганы өнөөдрийн /2023.06.23/ хуралдаанаар Нийгмийн даатгалын ерөнхий хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийж буй.
Энэ үеэр УИХ-ын гишүүн Д.Өнөрболор дараах байр суурийг илэрхийлэв. Тэрээр “Ард иргэдийн дунд маш их хүлээлттэй байсан нийгмийн даатгалын багц хууль орж ирж буй. Шинэчлэл гэсэн нэрдээ бүрэн агуулгаараа учир дутагдалтай байна. Миний хувьд С.Чинзориг сайдтай санал нэг байгаа. Зарлагын урсгал, төсөвт ачаалал бий болгох талаасаа илүү орлого, эдийн засгийн эргэлт талаасаа уг асуудалд анхаарч хариуцлагын тогтолцоог оруулж ирснээр цогцоороо суурь шинэчлэл байх байсан болов уу.
Төсвийн тодотголоор аваад үзэхэд жилдээ ойролцоогоор 1 их наяд төгрөгийн татаасыг нийгмийн даатгалын санд хийхээр болж байна гэж ойлголоо. Энэ шинэчлэлээр яг хэд болж байгааг тодруулна уу? 2020 оноос хойш тэтгэврийг хоёр удаа нэмлээ. Тэтгэвэр нэмэгдсэн атал үнийн өсөлтийг давж чадахгүй, амьжиргаанд хүрэлцэхгүй байгаа асуудал ард иргэдийн дунд шүүмжлэл дагуулж буй.
Иргэдийн зүгээс тэтгэвэр хуримтлагддаг, өвлөгддөг болох хэрэгтэй, инфляцын өсөлттэй уялдах хэрэгтэй гэсэн асуултад хариулт хүлээж байгаа. Хэзээнээс хэдэн хувиар тэтгэвэр хуримтлуулж эхлэх вэ? Хэзээнээс хэдэн хувиар хэнд өвлөгддөг болох вэ? Инфляцын өсөлтийг тэтгэвэрт хэрхэн тооцох вэ? Үүнд тодорхой тооцоололтой хариулт авмаар байна.
Өөрчлөлттэй холбоотой төсөв дээр ирэх зардлын тооцоолол бий уу? Хуримтлал болон өв хоёрт шилжүүлэхээр дутагдсан эх үүсвэрийг хэрхэн яаж шийдэх вэ? Бид нэг асуудалд анхаарлаа хандуулах хэрэгтэй байна Х.Булгантуяа сайд аа. Үүнд анхаарлаа хандуулаарай гэж би танаас хүсье. Залуу үе биднийг харж байгаа.
10-аад жил хүрэхгүй хугацаанд алдагдах эрсдэл үүсэж буй. Хөдөлмөр эрхэлж байгаа 10 хүн тутмын 10 хүн гурван хүний тэтгэврийг төлж буй. Цонх үе дуусах үед 10 хүн 8 хүний тэтгэврийг төлөх эрсдэл ойрхон байна. Хөдөлмөрийн насны 1,2 сая хүний ойролцоогоор 56 хувь нь нийгмийн даатгалын шимтгэлд хамрагддаг. Үүнийг бүрэн, шударга болгох, хамрагдалтыг нэмэгдүүлэхэд ямар бодлого, зохицуулалт хийж байна вэ?” хэмээн Хөдөлмөр, нийгмийн хамгааллын яамны сайд Х.Булгантуяагаас асуув.
