Ж.Одгарьд: Бид өнөөдөр өөрсдийгөө өмгөөлөх гэж энд суугаагүй. Хамгийн гол нь энэ асуудалд хүүхдийн эрх хөндөгдөөд байна6/ 23/ 2023 11 цаг 25 минут
Гандантэгчэнлин хийдээс нийгэмд мэдээлэгдээд буй хэрэг, үйл явдлын талаар сэтгүүлчид, хэвлэл мэдээллийн байгууллагуудын хүсэлтээр мэдээлэл хийж байна.
Гандантэгчэнлин телевизийн захирал Ж.Одгарьд, "Нийгэмд үүсээд байгаа нөхцөл байдал олны анхаарлын төвд хүрч, олон нийтийн байгууллага, иргэд, хууль хяналтын байгууллага хамтарч ажиллаж тухайн хэрэг гарсан байж болзошгүй нөхцөл байдлыг хянан шалгаж байна. Шүүхээр гэм буруутай нь тогтоогдоогүй тохиолдолд хэн нэгнийг гэм буруутайд тооцож болохгүй гэдэг заалт хуульд бий.
Гандантэгчэнлин хийдийн зүгээс олон нийтийн мэдээллийн хэрэгслээр тухайн хэрэг гарсан байна гэж мэдээлсний дараа шалгуулах хүсэлтээ гаргаж энэ хэргийг хянан шалгах ажиллагааг эхлүүлсэн. Хэрэг хянан шалгаж байгаа явцад тодорхой мэдээлэл өгөх боломжгүй байна. Гандантэгчэнлин хийд бол соёлын өвийн онцгой бүс, олон жилийн турш оршиж ирсэн Монголчуудын оюуны соёлын үнэт өв. Гэтэл үнэт өв рүү зүй бусаар харьцах, соёлын өвд халдах, ганцхан Гандантэгчэнлин хийд биш Монгол улсад үйл ажиллагаа явуулж байгаа шашны сүм хийд, лам хуврагуудыг харлуулах, тийм хэрэг хийчихсэн мэтээр ойлгох, нь түүнийг хууль хяналтын байгууллагаар баталчихсан мэтээр нэр бүхий улс төрчид улс төр хийж байгаа нь зохимжгүй асуудал юм.
Нийгэмд үүссэн энэ асуудалд бид цочирдож байна. Ярихад хүртэл хэцүү санагдаж байна. Нийгэм талцаж, маргаж, лам хуварга сүм хийдийг гутаан доромжлох асуудал үүссэнд харамсаж байна. Цаашид мөрдөн шалгах ажиллагаа үнэн зөвөөр шалгаж өгөх байх. Үүнд бид өндөр хариуцлагатай, үнэн зөвийг шалгуулах болно. Хэвлэл мэдээллийн хэрэгслүүд тухайн мэдээлэлд хариуцлагатай байж үнэн зөв тэнцвэртэй мэдээлэл хүргээрэй. Жишээ нь тухайн хэвлэл мэдээллийн байгууллага хүүхдийн халдашгүй эрхэд халдсан. Гандантэгчэнлин хийд хүүхдүүдийнхээ эрхийг хамгаалахын тулд хамгийн нэгдүгээрт байна. Бид өнөөдөр сүм хийдийн болон өөрсдийгөө өмгөөлөх гэж энд суугаагүй. Хамгийн гол нь энэ асуудалд хүүхдийн эрх хөндөгдөөд байна." гэлээ.
Гандантэгчэнлин хийдийн тамгын лам н.Сайнсүлд "Өмнө нь Гандантэгчэнлин хийдэд ийм асуудал гарч байгаагүй. Үүссэн нөхцөл байдлын талаар бид хууль хяналтын байгууллагад мэдээлэл өгч хамтарч ажиллаж байна. Гандантэгчэнлин хийдэд өмнө нь хүүхдийн эрх, хүний эрхийн шалгалтууд ирж байсан. Үүссэн байж болзошгүй нөхцөл байдалд шалгалтын ажиллагаа дуусах хүртэл дотооддоо болон холбогдох газруудад хамтраад ийм нөхцөл байдлын талаар хариу арга хэмжээ авч ажиллаж байна." гэлээ.
Гандантэгчилэн хийдийн Нийгэм, олон нийтийн асуудал хариуцсан тэргүүлэгч лам Б.Мөнхбаатар "Анх энэ ярилцлагыг хийхдээ тодорхой хүүхдүүдийн нэр усыг олон нийтэд зарласан явдал нь хүүхдийн эрхэд маш ноцтойгоор халдсан асуудал болсон. Үүнээс болж тухайн хүүхдүүд нийгэмд ялгаварлан гадуурхагдах, бодитой нөхцөл байдал үүссэн. Мөн тэрхүү ярилцлагуудын мушгин гуйвуулж, Монголд болон Энэтхэгт суралцаж байгаа хүүхдүүдийг харлуулж, эрхэд нь халдаж, гутаан доромжилж буй асуудал их гарч байна. Тиймээс энэ асуудалд цензуртай хандахыг хүсч байна. Хүүхдийн асуудал маш эмзэг байдаг. Гол нь энэ хэргийг үнэн зөв шийдэх ёстой" гэлээ.
Гандантэгчэнлин хийдийн цорж лам Б.Чойжилсүрэн "Ийм асуудал буддын шашинд байдаггүй зүйл. Би 1990 оноос энэ хийдэд шавилан сууж байна. Тэгэхэд ийм асуудал нэг ч удаа гарч байгаагүй. Монголын бурхан шашны өөрсдийн сахил санваар жаяг байдаг. Олон төрлийн санваар бий. Энэ дотроос доод түвшний сахилд эхнэртэй байж болно. Эхнэр хүнтэйгээ хурьцал үйлдэж болно. Өөр хүнтэй болохгүй. Ингэхдээ зүй бусаар бэлгийн харьцаанд орж болохгүй гэж байдаг. Энэ нь бөгс, ам тэргүүтэнд хийж болохгүй гэдэг. Эмэгтэй хүнтэй ингэж яригдаж байхад эрэгтэй хүнтэй бүр ч болохгүй гэсэн үг. Хэрэв байгаа бол тэр нь гаж үзэгдэл болно. Үүнийг Бурхан багш 2500 жилийн өмнөөс номлоод ирсэн номлолын дагуу энэ санваарыг сахъя гэдэгт бүгд ам тангарагаа өгөөд сахиад явж байгаа зүйл юм. Өнөөдрийн асуудалд гомо, гэй гэх мэтээр нэр хоч өгч байгаа нь байж болшгүй зүйл. Үүн дээр дүгнэлт хийж, өмнө нь байсан, хойшид гараад байх юм шиг ойлголт байж болохгүй. Үүнийг шашин зуун хувь эсэргүүцдэг. Хүсэл тачаалыг бид хорихын тухайд байдаг.
