АНУ-ын Хөдөө аж ахуйн яам энэ лхагва гарагт лабораторид ургуулсан мах худалдаах зөвшөөрөл гаргажээ. Тодруулбал, “Upside Foods”, “Good Meat” зэрэг компаниудад анхны зөвшөөрлийг олгосон байна. Түүнчлэн өнгөрсөн оны арваннэгдүгээр сард лабораторид ургуулсан махыг идэхэд аюулгүй гэх дүгнэлтийг АНУ-ын Хүнс, эмийн чанарын хяналтын газар гаргаад байсан юм.
“Upside Foods” компанийн үүсгэн байгуулагч, гүйцэтгэх захирал Ума Валети Хөдөө аж ахуйн яам зөвшөөрөл олгосон явдлыг “Мөрөөдөл биелж, шинэ эрин үеийн эхлэл тавигдаж байна. Энэхүү зөвшөөрөл нь бидний ширээн дээр тавигдах махыг үндсээр нь өөрчилнө. Энэ бол илүү тогтвортой ирээдүй рүү чиглэсэн агуу алхам юм” хэмээжээ.
Сонирхуулахад, лабораторид ургуулсан маханд амьтны уураг агуулагддаг бөгөөд үүгээрээ ургамлын гаралтай махнаас ялгаатай. Бидний идэж заншсан махнаас яльгүй өөр ч амьтны амь тасалдаггүй гэдэг утгаараа зөв шийдэл хэмээн хүлээн зөвшөөрөгдөж байгаа аж. Махыг лабораторийн аргаар бүтээхдээ амьд амьтны эсийг цуглуулж, эсийн банк бий болгодог бөгөөд улмаар эсүүдийг ган саванд ургуулж, амьтдын хэрэглэдэгтэй адил шим тэжээлээр тэжээдэг байна. Дараа нь филе, наггет зэрэг уламжлалт махан котлетны хэлбэрт оруулдаг.
Калифорнийн их сургуулийн хийсэн судалгаанд лабораторид ургуулсан махыг үйлдвэрлэх бүх үе шатанд зарцуулагдах эрчим хүч, ялгарах хүлэмжийн хийн хэмжээ нь уламжлалт махнаас, ялангуяа үхрийн махнаас илүү их байх магадлалтай. Гэхдээ өнгөрсөн сард танилцуулсан уг судалгааг салбарын мэргэжилтнүүд хараахан хянан нягтлаагүй байгаа аж.
