ХБНГУ-ын Берлин хотноо болж буй тусгай Олимпын зуны наадамд усанд сэлэлтээр оролцож буй манай улсын тамирчин, Монголын Дауны Холбооны гишүүн Э.Тэмүүлүн чөлөөт сэлэлтийн төрөлд мөнгөн медаль хүртлээ. Үндсэн, хагас шигшээ, шигшээ гээд гурван өдөр дарааллан олон орны тамирчидтай уралдаж олимпын медаль авсан байна.
Тусгай олимп гэдэг нь оюуны хөгжлийн бэрхшээлтэй хүүхдүүд, насанд хүрсэн хүмүүсийн спортын өрсөлдөөн, уралдаан тэмцээн бөгөөд гол зорилго нь энэхүү төрлийн хүмүүсийг спортоор дамжуулан биеийн болон оюуны хөгжлийг нь дэмжих, урам зориг өгөх, зөвхөн тэдний хооронд төдийгүй гэр бүл, найз нөхдүүдийн хүрээнд анд нөхдийн сүлжээ үүсгэх юм. Хамгийн анхны Дэлхийн Тусгай Олимпийн Зуны Наадам 1968 онд АНУ-ын Чикаго хотод болсон бөгөөд АНУ болон Канадын нийт 1000 орчим тамирчид оролцсон түүхтэй. Өдгөө 2 жил тутам ээлжлэн Тусгай Олимпийн өвөл ба зуны наадмууд зохиогддог.
Монгол Улс түүхэндээ анх удаагаа 2015 оны 7 дугаар сарын 25-нд АНУ-ын Лос Анжелес хотын Coliseum цэнгэлдэх хүрээлэнд эхэлсэн зуны наадамд оролцож, 14 тамирчин спортын 4 төрлөөр өрсөлдөж 4 алт, 4 мөнгө, 4 хүрэл медаль эх орондоо авч ирсэн байна.
Берлиний Тусгай Олимпын Зуны 16 дугаар наадмын нээлтийн ёслолын үеэр Монгол Улсаас ширээний теннисээр өрсөлдөж буй тамирчин, Монголын Дауны Холбооны гишүүн Б.Амарболд, түүний дэмжин тоглогч 47-р сургуулийн сурагч Л.Бат-Оргил нар Грекээс ирсэн Берлиний олимпын бамбарыг Сенегал, Ливи, Пакистан, Гуатемал, Герман улсын тамирчидтай цуг буухиалан залж гүйн нээлтийн үйл ажиллагааг нь албан ёсоор эхлүүлжээ. Берлин хот анх удаагаа зохион байгуулж буй тус наадамд 170 гаруй орны 7500 тамирчид, дэмжин тоглогчид оролцож байна.
Монгол Улсаа төлөөлөн Улаанбаатар хотоос гадна Баян-Өлгий, Завхан, Орхон, Төв, Сүхбаатар, Говь-Алтай, Дорнод, Өвөрхангай, Хөвсгөл, Ховд аймгийн нийт 44 тамирчин хөлбөмбөг, гар бөмбөг, сагсан бөмбөг, жүдо, усан спорт, ширээний теннис, боччи, бадминтон, хөнгөн атлетик зэрэг 9 төрлөөр оролцож байгаа юм.
Монголын Дауны Холбооны 6 тамирчин бадминтон, усанд сэлэлт, боччи, ширээний теннис, жүдо гэсэн спортын 5 төрлөөр оролцож байна.
Эх сурвалж: Ganzorig Vanchig
