УИХ-ын чуулганы зургадугаар сарын 16-ны нэгдсэн хуралдаанаар УИХ-ын сонгуулийн тухай хуулийн нэмэлт, өөрчлөлтийн төслийг баталсан. Хуулийн төслийн онцлох заалтын талаар УИХ дахь МАН-ын бүлгийн дарга Д.Тогтохсүрэн танилцуулсныг тоймлон хүргэж байна.
- УИХ-ын 78 гишүүнийг сонгуулийн тойргоор мажоритар буюу олныг төлөөлөх аргаар сонгоно. 48 гишүүнийг пропорциональ системээр сонгоно.
- УИХ-ын гишүүнийг жагсаалтаар сонгох сонгуульд Монгол Улсын нутаг дэвсгэр нэг тойрог байна.
- Гадаад улсад байгаа иргэдээс санал авна. Ингэхдээ зөвхөн жагсаалтаар нэр дэвшигч буюу намуудыг сонгох хувилбартай байна. Тойрогт дэвшиж байгаа нэр дэвшигчид гадаадад байгаа иргэн санал өгөх боломжгүй.
- Гадаадад байгаа иргэдийн санал өгөх хугацаа хоёр өдөр байсныг дөрөв болгон нэмэгдүүлэв.
- Сонгогчдын нэрсийг жагсаалттай нээлттэй танилцах боломжтой. Нэр дэвшиж байгаа нам эвсэлд санал авах өдрөөс 20-оос доошгүй хоногийн өмнө нэг удаа, санал хураахаас гурав хоногийн өмнө нэг удаа гээд хоёр удаа сонгогчдын нэрсийг жагсаалтыг цахим хэлбэрээр өгнө.
- УИХ-ын Сонгогчдын нэрсийг жагсаалт, бүртгэл, хяналтын дэд хороог нэгдүгээр сарын 1-ээс УИХ-ын цөөнх ахалж байхаар тусгав.
- Нэр дэвшүүлэх нэг хүйсийн хэмжээг хамгийн доод талдаа 30 хувь байхаар тусгалаа. Үүнийг 2028 оноос 40 хувь болгоно.
- Намын жагсаалтыг гаргахдаа хүйсийн харьцааг 1:1 байхаар хуульчлав.
- Сонгуулийн зардлыг бууруулах хүрээнд тээврийн хэрэгсэл дөрөв байсныг хоёр болгож, хэвлэмэл материалыг гурван хэвлэлийн хуудас байсныг хоёр болгож, хэвлэлийн хуудас гурван хэвлэлийн хуудас байсныг хоёр болгов. Мөн намын жагсаалтаар нэр дэвшигч гурван хэвлэлийн хуудаст багтаан сурталчилгаа хийнэ.
- Сонгуулийн сурталчилгаа хийх нэгдсэн самбар бий болгосон. Тойрогт нэр дэвшигч нь суманд хоёр хүртэлх, аймгийн төвийн сумд тав хүртэлх, хороонд дөрөв хүртэлх нэгдсэн самбартай байна. Самбарыг сум, хорооны засаг дарга зохион байгуулж бэлдэнэ. Нэр дэвшигч хэвлэлийн хуудасны 1/4 хэмжээгээр зургаа байршуулна.
- Намын жагсаалтаар нэр дэвшигчид зурагт самбар гаргана. Найман хэвлэлийн хуудсаас доошгүй байна. Одоо ажиллаж байгаа буюу бизнесийн зорилгоор ашигладаг самбарыг ашиглахыг хориглосон.
- Ухуулагчийн тоог багасгаж, 200 сонгогч тутамд нэг байсныг нийслэл болон аймагт 400 сонгогч тутамд нэг болгов. Сумын нэг багт нэг ухуулагч байна.
- Телевизийн мэтгэлцээнийг үнэ төлбөргүй зохион байгуулна.
- Цахим сурталчилгаанд нийт зардлынхаа 15 хувь хүртэлх зардлыг зарцуулах боломжтой.
- Саналын хуудас хоёр хэлбэртэй байна. Нэг нь тойргийнх. Нөгөө нь нам эвсэлд өгөх саналын хуудас байна.
- Сонгуулийн саналын хуудас бэхэн тэмдэглэгээтэй болсон.
- Бүх хэсгийн хороонд хяналтын тооллого хийнэ.
- Намууд тойрогт ногдох нийт мандатын 50 ба түүнээс дээш хувьд нэр дэвшүүлэх ёстой. Намд дөрвөн хувийн босго, хоёр нам эвсвэл таван хувийн босго, 3 ба түүнээс дээш нам эвсвэл долоон хувийн босго тавина.
