Орон нутгийн жижиг "Тавантолгой" ХК, "Эрдэнэс Тавантолгой" ХК-ийн тусгай зөвшөөрлийн талбайгаас 340.1 мянган тонн нүүрс олборлосон байдаг. Үүний 126.5 мянган тонн нь коксжих, 201.8 мянган тонн нь эрчим хүчний нүүрс, 11.7 мянган тонн нь сааж нүүрс.
340.1 мянган тонн нүүрснээсээ 69.4 мянган тонн коксжих нүүрсийг л өгөөд байсан бол цаана нь 270.7 мянган тонн нүүрсний өртэй байсан билээ. Улмаар 48 тэрбум төгрөгийг өгч өр төлбөрөө хаасан. "Ажнай" Д.Бат-Эрдэнэ мөргөцөг олборлосноо хүлээн зөвшөөрөөд өрөө төлчихсөн гэсэн үг.
Гэвч хоёр компанийн хооронд үүссэн асуудал дуусаагүй байна.
Одоо ЭТТ-н уурхайн амны урд талд жижиг "Тавантолгой" ХК овоолго үүсгэж орхисон ч, авахгүй удаж байгаа аж. "Эрдэнэс Тавантолгой" овоолго доорх нүүрсээ олборлох хүсэлтэй тул зөөх шаардлага тавьсан байна.
Эл овоолгын хэмжээ 6 сая метр3 гэдэг мэдээлэл бий. Нэг метр3 зөөх үнэ ханш ойролцоогоор 8920 төгрөг. Тэгэхээр 6 сая метр3 шороог зөөхөд 53 тэрбум төгрөг шаардлагатай гэсэн үг. "Тавантолгой" ХК ийм хэмжээний хөрөнгө мөнгө гаргаад зөөх арга хэмжээ авч чадахгүй удаж байгаа нь энэхүү мөнгө хөрөнгөтэй холбоотой болж таарах нь.
