Нүүрсний хулгай 44их наядын хэрэгт бухимдсан иргэд хахир өвлийн хүйтэнд гадаа жагсаж байсан цаг саяхан. Гэвч энэхүү хэрэгт нэр холбогдсон УИХ-ын гишүүд шалгагдах битгий хэл ажлаа хийгээд явж байна нь үнэн юм. Нүүрсний хэрэгт УИХ-аас түр хороо байгуулж УИХ-ын гишүүн Г.Ганболдоор ахлуулсан. Гэвч хэдэн сар өнгөрөхөд тайлан бүү хэл сонсгол нь явагдсангүй. Энэ асуудлаар ажлын хэсгийн ахлагч Г.Ганболд мэдээлэл өгөхдөө МАН, ХҮН намынхан сонсголыг хойшлуулсан гэх тайлбарыг өгсөн. Тэгвэл манай редакц ХҮН намын дарга Т.Доржхандын байр суурийг тодрууллаа.
УИХ-ын гишүүн Т.Доржханд: Нүүрсний сонсголыг хамгийн анх санаачилсан УИХ-ын гишүүн нь би. Хөгжлийн банкны нотлох баримтын хүрээнд сонсгол хийгдсэн яг түүнтэй адилхан нотлох баримтын хүрээнд сонсгол хийх асуудал товлогдсон байсан. Ямар шалтгаанаар больсон бэ гэхээр АТГ-аас сонсголыг зохион байгуулж болохгүй юм байна. Учир нь эдгээр хүмүүсийн хэрэг мөрдөн байцаах шатанд явж байна. Ийм эдгээр хүмүүсийг сонсголд дуудаад оролцуулсан тохиолдолд мөрдөж байгаа хэргүүд цаашаа явахааргүй болчхоод байна. Хоёрдугаарт тэдгээр хүмүүс ирэх үү, үгүй юу гэх асуудал хөндөгдсөн. Тийм учраас бид ажлын хэсэг болох түр хороон дээрээ ярьсан.
Харин миний байр суурь анхнаасаа нүүрсний сонсголыг заавал хийх ёстой. Хийхдээ тухайн үеийн Ерөнхийлөгч, ерөнхий сайд, мөн өнөөдөр шооронд хоригдож байгаа Эрдэнэс таван толгой компанийн захирал байж байгаад оргон зугтаасан Удаанжаргал гэх хүмүүсийг бүгдийг нь авч ирэх хэргтэй. Мөн офтек гэрээ гэх хэн ч мэдэхгүй нууц гэрээ байгуулчхаад байгаа тэр бодь интернэшнл, голомтын Баясгалан мэтийн хүмүүсийг оролцуулж хийхгүй юм бол тэрхүү сонсгол нэр төдий болно. Тийм учраас эдгээр хүмүүсийг яаралтай ирүүлэх, эсвэл АТГ мөрдөн байгуулах ажлаа яаралтай дуусгах хэрэгтэй.
АН-ын бүлэг дээр МАН-ын нөхдүүд болон Доржханд гэх мэт нөхдүүд хойшлуулчихсан юм шиг буруу мэдээлэл өгөөд байна. Хөгжлийн банкны сонсголыг зохион байгуулахад АН-ын тэдгээр нөхөд хаана байсан юм. Тэд нар ирээгүй ш дээ, ямар их ажил, бичиг цаас зарцуулагддаг вэ гэдгийг мэдэхгүй.
Хил гааль, боомтын түр хороо татан буугдсаны дараа би гарын үсгээ цуглуулаад заавал явна. Нийхдээ энэ хаврын чуулганд амжихгүй бол намрын чуулганаар заавал хийнэ.Миний хувьд нүүрсний сонсголыг УИХ-ынэ гишүүн Н.Ганибалаар ахлуулмаар байна. Ямар их ажил болдгийг мэдрүүлэх хэрэгтэй.
