Өнгөрсөн онд Хятадад 6.83 сая хүн гэрлэжээ. Энэ нь жилийн өмнөхөөсөө 10.5%-иар бага бөгөөд 1986 оноос хойших хамгийн бага үзүүлэлт гэж Хятадын Иргэний хэргийн яамны мэдээллээс иш татан The Guardian мэдээлэв.
Хятадад гэрлэлтийн тоо 2014 оноос хойш тасралтгүй буурч, ялангуяа сүүлийн жилүүдэд эрс буурч байна. Гэрлэлтийн оргил үе нь 2013 он болсон бөгөөд тэр жил бараг 13.5 сая хос гэрлэж байв. Үүний зэрэгцээ сүүлийн жилүүдэд залуу эмэгтэйчүүд хожуу гэрлэхийг илүүд үздэг болсон. Энэ учир шалтгааны улмаас 2010-2020 онд тэдний гэрлэх нас 24-өөс бараг 29 болж нэмэгдсэн байна. Мичиганы их сургуулийн социологич Юн Жоу хэлэхдээ, "залуу эмэгтэйчүүд гэрлэлтэд шүүмжлэлтэй ханддаг болсон бөгөөд бүр "эмэгтэйчүүдийг дарангуйлах патриархын институт" гэж нэрлэдэг" гэжээ.
Төрөлтийн түвшин түүхэн дээд хэмжээнд буурсантай холбогдуулан гэрлэлтийн тоо буурч, төрөлтийг дэмжих талаар тус улсын эрх баригчдын авч хэрэгжүүлж буй арга хэмжээ хараахан үр дүнд хүрээгүй байгааг харгалзан бүс нутгийн эрх баригчид залуучуудыг гэрлэхэд түлхэц өгөх өөрсдийн арга замыг хайж байна.
Энэ хүрээнд зарим мужид шинээр гэрлэсэн хүмүүст 30 хүртэлх хоногийн чөлөө олгодог. Мөн Хятадын гэр бүл төлөвлөлтийн нийгэмлэг 2022 онд үндэсний хэмжээнд "Гэрлэлт ба хүүхэд төрүүлэх шинэ үзэл баримтлал"-ыг дэмжих туршилтын хөтөлбөрийг өргөтгөсөн. Уг хөтөлбөр нь залуучуудыг 30 нас хүртэл хойш тавилгүйгээр “зохистой насандаа” гэрлэхийг уриалж, залуу эцэг эхчүүд хүүхдээ өсгөн хүмүүжүүлэх үүрэг хариуцлагыг өөр хоорондоо хуваалцахыг уриалж байна.
Үүний зэрэгцээ Хятадад гэрлэлт төдийгүй гэр бүл салалтын тоо буурч байна. 2022 онд 2.1 сая гэрлэлт салсан нь жилийн өмнөхөөс бага үзүүлэлт юм.
Эх сурвалж: Сentralasia.media
