Элсэлтийн ерөнхий шалгалт өнөөдөр орон даяар 10:00 цагт түүх, англи хэлний хичээлээр эхэлж байна. Шалгалтын талаар Боловсролын үнэлгээний төвөөс мэдээлэл хийлээ.
Боловсролын үнэлгээний төвийн дарга Д.Ганбат "Энэ жилийн ЭЕШ-д нийт 34.432 шалгуулагч хамрагдахаар бүртгүүлсэн. Бүртгэл хоёрдугаар сарын 15-наас дөрөвдүгээр сарын 25-ны хугацаанд үргэлжилсэн. Энэ жилийн хувьд 30 мянга орчим нь энэ онд 12 дугаар ангийг сурч, төгсч буй. Өмнөх онд төгссөн 4000 гаруй шалгуулагч байна. Нийт шалгуулагчийн ихэнх буюу 23 мянга орчим нь математикийн хичээлийг сонгосон байна. Харин түүхийн хичээлийг 1600 орчим шалгуулагч өгч байна. Англи хэлний хичээлийг 21.976 шалгуулагч өгөхөөр бүртгүүлсэн. Өнгөрсөн жилээс ЭЕШ-ыг нэг жилд хоёр удаа зохион байгуулдаг болсон. Энэ жил зургаа, арванхоёрдугаар сард зохион байгуулна. Үүнтэй холбоотойгоор их сургуулиуд өвлийн нэмэлт элсэлтийг хийдэг болсон. Аймаг, төв болгонд нэгдсэн хяналтын систем ажиллаж, шалгуулагчдын мэдээллийг авч байна. Эмнэлгийн анхан шатны тусламж үзүүлэх эмч нар шалгалтын байранд ажиллаж байгаа. 2007 оноос хойш шалгалтын материал задарч байсан тохиолдол огт байхгүй.
Энэ жилийн ЭЕШ-ыг блокчейн системд суурилсан байдлаар авч, оноог нэгтгэнэ. Шалгалтаа өгч дуусаад шалгуулагчдын дүн оноо нь автоматаар блокчейн системд байршиж байгаагаараа онцлог. Блокчейн системд байршсан дүн оноо тав, 10 магадгүй 100 жилийн хугацаанд устаж үгүй болохгүй, баталгаатай хадгалж байгаа. Блокчейн систем нь хөндлөнгийн хүний оролцоогүй, гаднын нөлөөгөөр өөрчлөлт хийх боломжгүй гэх мэт давуу талтай. Шалгалт өгөхөөр очихдоо Бүртгэлийн хуудас, суудлын хуваарь, Иргэний үнэмлэх болон түүнтэй адилтгах баримт бичиг, Бүрэн дунд боловсролын үнэмлэх, түүнээс дээш боловсрол эзэмшсэнийг гэрчлэх баримт бичиг зэргээ марталгүй авч очно.
Мөн бүртгэлийн дугаар, нууц үгээ мартсан бол 133233 гэсэн тусгай дугаарт регистрийн дугаарын найман оронтой тоогоо мессежээр илгээн хурдан шуурхай хариугаа авах боломжтой. ЭЕШ зохион байгуулахаар хянан шалгагч, багш, цагдаа, эмч, үйлчлэгч гээд нийт 2460 орчим хүн ажиллаж байна." гэлээ.
