"Вагнер"-ийн хөлсний цэргүүд нийгмийн баталгаа авахын тулд Оросын Батлан хамгаалах яамтай гэрээ байгуулахгүй гэж тус бүлгийг үүсгэн байгуулагч Евгений Пригожин мэдэгдэв.
“Төрийн Дум, Ерөнхийлөгч хоёр хөлсний цэргүүдийн нийгмийн баталгаа болон тэдэнд дайнд оролцсон гэсэн баримт бичиг олгох талаар ямар нэгэн эерэг шийдлийг олно гэж би бодож байна. Миний цэргүүдээс 20,000 гаруй нь амь үрэгдсэн. Тэгэхээр тэд ч гэсэн Батлан хамгаалах яамтай гэрээ байгуулах ёстой юу?" гэж Пригожиний хэлсэн үгийг түүний хэвлэлийн алба иш татав.
Тэр мөн "Вагнер"-ийн хөлсний цэргүүд гэрээ байгуулахгүй бол Украины эсрэг дайнд оролцох боломжгүй болно" гэсэн Батлан хамгаалах яамны удирдлагуудын мэдээллийг Пригожин "үлгэр" гэж нэрлэжээ.
"Хариулт нь маш энгийн: Орос хүнийг газар нутгаа хамгаалахыг хэн ч хориглож чадахгүй. Батлан хамгаалахын сайдад ч, ер нь хэнд ч үүнийг хийх эрх байхгүй. Зөвхөн Бурхан л үүнийг хийх эрхтэй. Тиймээс бид хэн юу гэж хэлж байгаагаас үл хамааран газар нутгаа хамгаалсаар байх болно" гэж Пригожин хэлэв.
Сануулахад, 6-р сарын 10-нд ОХУ-ын Батлан хамгаалахын сайд Сергей Шойгу Украинд тулалдаж буй бүх "сайн дурын отряд"-уудыг 7-р сарын 1-нээс өмнө Батлан хамгаалах яамтай гэрээ байгуулахыг тушаасан юм. Шойгугийн энэ тушаал тус улсын БХЯ-ны удирдлага Пригожин хоёрын хооронд үүссэн зөрчилдөөн, Шойгу болон Жанжин штабын дарга Валерий Герасимов нарыг огцрохыг удаа дараа шаардсан зөрчилдөөн үл ойлголцолын фон дэвсгэр дээр гарсан юм.
Путин 6-р сарын 13-нд цэргийн сурвалжлагчидтай уулзахдаа Шойгугийн шийдвэрийг дэмжсэн байна. Түүний хэлснээр "сайн дурынхан" нийгмийн баталгаа авахын тулд эрх зүйн статустай байх шаардлагатай. "Эхлээд Батлан хамгаалах яамтай гэрээ байгуулах хэрэгтэй. Хоёр дахь нь хуулиа өөрчлөх. Аль аль нь биелэх болно" гэж Путин баталжээ.
Ерөнхийлөгч Пригожинд Батлан хамгаалах яамтай гэрээ байгуулах ёстой гэдгийг сануулахыг оролдсон гэж улс төр судлаач Аббас Галлямов хэлэв.
"Тэр Пригожинд үүнийг тушааж үүрэг болгож байгаа бус, харин түүнийг ятгаж байгаа юм шиг харагдсан. Үр дүн нь Пригожин гэрээ байгуулахгүй гэдгээ хэлсэн, гэхдээ бидэнд төлбөрөө хэрхэн төлөх талаар өөрсдөө бодож үзээрэй гэж хэлэн гэжээ. Эндээс харахад элитүүдийн хоорондын харилцаанд зохицуулагчийн үүргээ биелүүлэх нь Путинд улам хэцүү болж байна гэж Галлямов дүгнэжээ.
Эх сурвалж: Мoscowtimes.ru
