Боловсролын зээлийн сангийн мэдээллийг иргэдэд нээлттэй, ил тод болгох шийдвэрийг Засгийн газраас гаргасан. Энэ талаар ЗГХЭГ-ын даргын зөвлөх, Боловсролын үнэлгээний төвийн захирал Ж.Ган-Эрдэнэ мэдээлэл өглөө.
Тэрбээр "Иргэдийн бухимдлыг төрүүлээд буй сонгон шалгаруулалтыг хэрхэн ил тод байлгах вэ гэдэг асуудлыг Засгийн газрын хуралдаанаар хэлэлцсэн. Сонгон шалгаруулалтад материалын шалгалт гэж байдаг. Тухайн хүн материалаа илгээгээд материалыг нь хүн шалгаад оноо тавьдаг. Тэгвэл материалыг шалгах автомат систем нэвтрүүлж байгаа. Ингэснээр хүний оролцоогүйгээр шалгуулагч хэдэн оноо авснаа харах боломжтой болж байгаа.
Мөн суралцах чадварын үнэлгээг оруулж ирж байгаа. Тодруулбал, олон нийтийн өмнө нээлттэйгээр дараагийн шатны боловсролыг эзэмшиж чадах эсэхийг нь тодорхойлсон олон улсын хорин нэгдүгээр зууны зөөлөн ур чадварын үнэлгээ хийгдэнэ. Энэ үнэлгээ нь шалгалт өгсөн даруйд шууд хариу нь гарна. Ингэснээр зээл, тэтгэлэг авчхаад тухайн чиглэлээрээ суралцахгүй байх, төгсөхгүй байх асуудлууд байсан бол үүнийг урьдчилж мэдэж болох боломжтой болж байгаа нь давуу талтай юм.
Гол нь зүйл нь БЗС-гийн үйл ажиллагаа хүний оролцоогүйгээр явагдах бүрэн боломж нээгдэж байна." гэлээ.
Мөн өмнө нь төрөөс зохион байгуулдаг уралдаант шалгаруулалтад хувь хүний хүчин зүйлээс нөлөөлдөг том зүйл нь ярилцлага хийх байдаг. Төр ярилцлага хийх зүйлийг оруулах гэж хичээгээд байдаг. Тэгвэл Засгийн газар ярилцлага хийдэг байдлаас бүрэн татгалзъя. Хорин нэгдүгээр зууны дэвшилтэт чиг хандлагын дагуу хүний оролцоогүй бүрэн автомат системээр сонгон шалгаруулалтыг хийе гэж тогтсон гэдгийг ЗГХЭГ-ын дарга Д.Амарбаясгалан онцоллоо.
