"АЗЗА компаниудыг нэгтэж хувьцаа гаргана, ашиг олно гэж байгаа нь зам эзэнгүй, арчлалт чанаргүй болно гэсэн үг"6/ 14/ 2023 13 цаг 10 минут
"Авто зам засвар арчлалт" ТӨХК-иас 20 байгууллагыг нэгтгэхийг эсэргүүцэж буй талаар Монголын авто замчдын ҮЭ-үүдийн холбооноос мэдээлэл өгч байна.
Мэдээлэлдээ "Авто замын АЗЗА компаниуд 40-60 жил үйл ажиллагаагаа явуулж байна. Авто зам өөрөө ашгийн бус байгууллага байна. Энэ шийдвэр нь нийгэмд хортой, иргэд хэрэглэгчийн аюулгүй байдлыг алдагдуулах шийдвэр болсон. Авто замчдын төрийн өмчийн компанид хамгийн багадаа 40 хүн ажиллаж байгаа. Хувийн хэвшлийн 8 компани 8-10 ажилчидтайгаар үйл ажиллагаа явуулдаг. Энэ ажилчдын одоо нийгмийн хамгаалал, ажлын байрны баталгаа алдагдана гэж үзэж байгаа.
АЗЗА компаниудын ажилчид олон жил ажилласан, дадлага туршлагатай, мэргэшсэн боловсон хүчинтэй, дээр нь хөрөнгө мөнгө байдаг. Тэгэхээр энэ их хөрөнгө мөнгийг идэх шамшигдуулах ийм шийдвэр гарлаа гэж үзэж байна. Яагаад гэхээр жишээлбэл, АЗЗА-ын Ховд аймагт 2 давхар байрны нэг давхар нь Ховд АЗЗА үйл ажиллагаагаа явуулдаг. 2 давхарт нь замын нэг компани нь нэр бүхий УИХ-ын гишүүний өмчлөлд байж байх жишээтэй. Газар нь хүртэл 2 хуваагдчихсан байдалтай байгаа. Тэгэхээр энэ өмч хөрөнгийг авах шийдвэр нь буруу юм. АЗЗА компаниудыг хориод жилийн өмнө нэгтгэж байсан. Нэгтгэж үзээд боломжгүй юм байна, тус тусдаа статустай компани байх ёстой гээд тусад нь гаргасан. Авто зам болбол өөрөө олон нийтийн өмч. Стратегийн ач холбогдолтой ийм замыг нэгтгэж болохгүй. АЗЗА-нууд нь ашиг олдоггүй. Улсын төсөвт 100 тэрбум төгрөгөөр улсын чанартай авто замд засвар арчлалт хийнэ гэх тооцоог Азийн хөгжлийн банкнаас судалгаа гаргаж өгсөн байхад 35 тэрбум төгрөгийг баталж өгдөг. 35 тэрбум төгрөг баталж өгчхөөд хувьцаа гаргана ашиг олно гэж байгаа нь зам эзэнгүй, засвар арчлалт чанаргүй болж, хохирол үзнэ гэж үзэж байна" гэлээ.
