Улс төрд нөлөө бүхий, эрх мэдэлтэй хүмүүс мэдээлэлд ойр гэдгээ ашиглан иргэдийн боломжийг хулгайлдгийг бид олон жишээнээс харж байна. Үүний нэг тод жишээ бол "Хөгжлийн банк"-ны гэх хэрэг юм. Өдгөө 42 дахь өдрөө үргэлжилж байгаа уг шүүх хуралд холбогдсон хүмүүсийн ихэнхи нь бидний мэдэх улс төрчид, бизнесийнхэн байв.
Манай улсад энэ мэт их хэмжээний мөнгөтэй холбогдсон хэрэг заавал олны анхааралд орж байж л төллөгддөг жишиг хэдийн тогтжээ. Хөгжлийн банкны гэх уг асуудал нийтэд ил болсны дараа зээлээ бушуухан шиг төлсөн улс төрчид бизнесийнхий цуваа хөвөрч байгаагийн нэг тод илрэл нь УИХ-ын гишүүн Х.Ганхуяг юм.
Тодруулбал, 2020 оны эхээр Хөгжлийн банкнаас 33 тэрбум төгрөгийн зээл авсан “Вертекс майнинг сервис” гэх компанитай Х.Ганхуяг холбогддог. Тэрбээр зээлээ өнгөрсөн оны зургадугаар сарын 28-нд төлж барагдуулсан ч сонгуулийн өмнөх жил гавьяа байгуулчихсан юм шиг бахдалтайгаар зээл төлсөн баримтаа гаргаж ирж байгаа нь ирэх жилийн сонгуульдаа бэлдэж байгаагийн илрэл гэлтэй.
Бусдын боломжийг хулгайлан хэрэг хийчихээд прокурорын байгууллагаас яллах дүгнэлт үйлдчихээд байхад авсан зээлээ барагдуулчихсан гээд хэрэг нь цагаатгагддаг байх учиргүй. Жишээ дурьдхад л өнгөрсөн жил дэлгүүрээс бэлэн гоймон, тамхи, хиам зэрэг наад захын хүнсний хэрэглээний бүтээгдэхүүнийг хулгайлсан иргэнд Монгол улсын шүүх 1,5 жилийн хорих ялыг өгч байсан. Харин шунал нь барагдаагүй улс төрчид, бизнесийнхэн улсын төсвийг хоосолж, иргэдийн боломжийг хулгайлчихаад зээлээ хүүтэй нь барагдуулчихлаа гэхэд өршөөх учир байхгүй болов уу хууль хяналтын байгууллага, шүүх, прокурорынхоон!
Ц.Мөнх
