“Хөгжлийн банк”-ны гэх тодотголтой шүүх хурал өнөөдөр 40 дэх өдрөө хуралдаж байна.
Прокурор "Бэрэн групп" Хөгжлийн банкнаас зээл авах үедээ явуулсан ажиллагааны талаар танилцуулав.
-"Бэрэн групп” хөгжлийн банкнаас зээл авах үедээ нийслэлийн бүртгэлийн мэргэжилтэнд хахуул өгч 80 хувийн гүйцэтгэлтэй гэсэн гэрчилгээ гаргуулсан.
-"Бэрэн групп” санхүүгийн баримт хуурамчаар үйлдэж, 2021 онд ковид-19 өвчнөөр нас барсан хамаатныхаа хүнийг мөнгө авсан мэт баримт бүрдүүлсэн. Энэ талаар нас барсан хүнээс тодруулга авах боломжгүй гэх байдлаар хандсан нь Эрүүгийн хэрэг хянан шалгах ажиллагаанд саад учруулсан.
-"Бэрэн групп"-ийн гүйцэтгэх захирал М.Цэлмэг тухайн гурван баримтыг аавынхаа үйлдсэн гэмт хэргийг хаацайлан "би үйлдсэн" гэдэг байдлаар мэдүүлэг өгсөн. Худал мэдүүлэг өгөх гэмт хэрэг үйлдэгдэж, энэ нь нотлох баримтуудаар тогтоогдсон.
-Хэрэг шүүхэд шилжих саналтай явж байхад, "Бэрэн групп" битүүжилсэн байсан тодорхой объектуудыг чөлөөлүүлээд худалдан борлуулаад, мөнгийг нь шууд Хөгжлийн банкны дансанд шууд олгохоор Хөгжлийн банктай тохиролцсон байсан. Гэтэл энэ тохиролцоогоо эвдсэн байсан талаар Хөгжлийн банкнаас прокурорын байгууллагад хүсэлт ирсэн. Тодруулбал, "Бэрэн мортеж" гэх хамаарал бүхий компаниараа ХХБ-д данс нээж, Хангай хотхоны борлуулалтын орлогыг авч тохиролцоогоо зөрчиж байна гэсэн. Тухайн дансыг прокурорын байгууллагаас битүүмжилсэн. "Бэрэн групп" мөрдөн шалгах ажиллагааны явцад хүртэл ийм үйл ажиллагаа явуулсан.
-"Бэрэн групп" зээлийн гэрээний дагуу Япон улсын төслөөр оруулж ирэх хөрөнгөө оруулаад ирсэн бол, өөрөөс оруулах зориулалттай мөнгөө оруулсан байсан бол, санхүүжилтээр олгосон мөнгөөр казино тоглоогүй байсан бол, бусад зээлээ төлөөгүй байсан бол, зөвхөн зориулалтын дагуу ашигласан байсан бол үйлдвэр өнөөдөр дуусчихсан байх байсан. Арматур үйлдвэрлэгдэж гараад түүнийгээ борлуулж, Хөгжлийн банкнаас авсан зээлээ нүүр бардам төлөөд энд ингэж суух нөхцөл байхгүй байх байсан.
Мөрдөн шалгах ажиллагааны явцад ЭХХША-ны эсрэг хоёр гэмт хэрэг үйлдэгдсэн" гэв.
