Л.Оюун-Эрдэнэ: Хагас жилд 1.1 их наяд төгрөгөөр төсвийн орлого давж биелж буй нь ийм хэмжээний далд эдийн засаг ил болсон гэсэн үг
2023 оны төсвийн тухай хуульд өөрчлөлт оруулах тухай хуулийн төслийг УИХ-ын чуулганд танилцууллаа.
Монгол Улсын Ерөнхий сайд Л.Оюун-Эрдэнэ Монгол Улсын 2023 оны Төсвийн тухай хуульд өөрчлөлт оруулах тухай хуулийн төслийг танилцуулж УИХ-ын нэгдсэн чуулганд хэлсэн үгэндээ “Монгол Улсын эдийн засаг өсөхтэй зэрэгцээд тодорхой хэмжээний далд эдийн засаг ил болж буй”-г дурдаад “Төсвийн орлого хагас жилд 1.1 их наяд төгрөгөөр давж биелсэн нь ийм хэмжээний далд эдийн засаг ил болсон гэсэн үг” хэмээн онцлов. Цаашлаад энэ үзүүлэлт бүтэн жилийн хугацаанд 1.7 их наяд төгрөг хүрэх төлөвтэй байгааг мэдээллээ. Мөн “Төсвийн орлого дутсанаар тодотгол хийдэг байсан бол энэ удаа төсвийн орлого давж биелснээр зохицуулах тодотгол хийхээр төлөвлөж байгаа” гэв.
Монгол Улсын Ерөнхий сайд Л.Оюун-Эрдэнэ
“Эдийн засгийн өсөлтийн үзүүлэлт бол хоосон тоо биш юм. Нэг хувийн өсөлт ойролцоогоор 600 орчим тэрбум төгрөгийн орлого байдаг. Эдийн засаг өссөнөөр Монгол Улсын төсвийн орлого хагас жилд 1.1 их наяд төгрөгөөр давж биелж, энэ оны эцсийн 1.7 их наяд төгрөг хүрэх төлөвтэй байна. Хагас жилд 1.1 их наяд төгрөгөөр төсвийн орлого давж биелнэ гэдэг нь ийм хэмжээний далд эдийн засаг ил болсон гэсэн үг юм” гэж мэдэгдлээ.
Монгол Улсын эдийн засаг I улирлын дүнгээр 7.9 хувийн өсөлттэй гараад байна. Монголбанкны судалгаагаар Монгол Улсын сүүдрийн эдийн засгийн хэмжээ сүүлийн 13-20 жилийн дунджаар 32 хувьтай гараад байгаа аж.
Сүүдрийн эдийн засаг үүсэх гол шалтгаан нь татварын дарамт, нийгмийн даатгалын өндөр шимтгэл болон бизнесийн үйл ажиллагаатай холбоотой аливаа дүрэм журам гэж судалгаанд дурджээ.
Түүнчлэн сүүдрийн эдийн засгийн хэмжээг нэмэгдүүлэхэд мөнгө угаахтай холбоотой үйл ажиллагаа, авлигын түвшин нөлөөлсөн байх боломжтой гэж судлаачид үзэж байгаа юм.
"Transparency International" байгууллагын судалгаагаар Монгол Улс 2022 оны "Авлигын төсөөллийн индекс"-ээр 33 оноо авч, 2017 оноос хойш энэ үзүүлэлтээр тасралтгүй муудаж буй 10 улсын нэг болоод байна.
