Улс орны эдийн засгийг хэд дахин өсгөж, тэлнэ гэж эрх баригчдын зүгээс тодотгож буй Шинэ сэргэлтийн бодлогод тусгасан үндсэн зургаан асуудлын нэг нь Боомтын сэргэлт. Уг нь боомтын асуудлыг Зам, тээврийн хөгжлийн яам хариуцан хамаарах учиртай ч Л.Оюун-Эрдэнийн Засгийн газар Шинэ сэргэлтийн бодлогын пиараа тултал хийх үүднээс бүр Боомтын яам байгуулчихсан. Эхлээд Х.Булгантуяаг сайдаар тавьснаа больж, өдгөө Н.Энхбаярын хүн гэх тодотголтойгоор танигдсан Б.Тулгыг томилоод буй.
Тэгвэл шинэхэн яамны шинэ сайдаар томилогдоод буй Б.Тулга эхнээсээ л олон нийтээс таагүй үнэлэлт дүгнэлт аваад эхэллээ. Тодруулбал, Монгол Улсын уул уурхайн үүц их баялгийг төдийгөөс өдийг хүртэл хадгалж авч ирсэн Өмнөговьчууд нутагт нь дахин нэг боомт нээхийг эсэргүүцсээр байгаа. Өмнөговьд өнгөрсөн олон жилд хоёр боомтоор хориод уурхайн баялгийг гаргаж өдийг хүрчихээд одоо дахиад Цагаандэл боомт гэж нээгээд 70-аад уурхай нээж, нутаг орных нь хамаг өнгөтэй өөдтэйг урсгах нь гэж нутгийн иргэд бухимдалтай байгаа юм.
Өнгөрсөн өдрүүдэд Боомтын сайд Б.Тулга Цагаандэлийн асуудлаар тэмцэж буй иргэдийн төлөөлөлтэй уулзахаар очсон ч тэрбээр сайдын хувиар дорвитой зүйлс огт хэлж ярьж чадахгүй шийдвэр гаргаж чадахааргүй байна гэсэн шүүмжийг нутгийн иргэдээс сонслоо.
Өмнөговийн иргэдийн хэлж ярьж буйгаас үзэхэд, Цагаандэлийн боомт бол улс орныг хөгжүүлэх гэхээсээ илүүтэй уул уурхайн баялгийн ашиглалтад эрх мэдэл, нөлөөллийн давуу талаа ашиглан далд эдийн засгийг цэцэглүүлсэн бүлэглэлүүдийн дараагийн гарц боломжоо нээх гэсэн арга зам л гэж үзээд байгаа аж. Боомтын сэргэлт гэж сүрхий пиар хийж, сурталдаад байгаа хэрнээ үнэн хэрэгтээ одоогийн экспортын хоёр боомт нь хөгжсөн юмгүй.
Гэтэл Хятадын боомтууд хэрхэн яаж хөгжөөд байгааг Боомтын сайдыг нүдээрээ харж мэдрэхийг иргэд зөвлөж байгаа юм. Нэг ёсондоо байгаагаа торддоггүй хэрнээ дахиад нэг боомт нээхийн цаана байгаль орчны асуудлууд үүсэхээс гадна баялгийн тэгш бус хуваарилалтын асуудлууд ч дахин давтагдах гээд байна гэж иргэд үзэж буй юм. Одоогийн 20-иод уурхайгаа хариуцлагатай ажиллуулж чадахгүй байж юун гурав дахь боомт вэ гэж иргэд үндэслэлтэй хариулт шаардаж байна.
Тодруулбал, АЛДАРТ БОРЗОНГЫН ГОВЬ, ЦАГААНДЭЛ УУЛАА ХАМГААЛАЯ ХӨДӨЛГӨӨНИЙ гишүүд дэмжигчдийн зүгээс энэ сарын 27-нд Монгол Улсын сайд, Боомтын сэргэлтийн үндэсний хорооны дарга Б.Тулгад илгээсэн шаардлагадаа: Өмнөговь аймгийн нутгаар НҮҮРСНИЙ ХУЛГАЙЧ нарт зориулж 3 дахь боомт ЦАГААНДЭЛ УУЛ боомт нээхийг зөвшөөрсөн Засгийн Газрын 2014 оны 46 р тогтоолыг цуцлахыг шаардаж байна гэжээ. Харин Боомтын шинэ сайд Б.Тулга иргэдэд дорвитой, шийдвэртэй хариулт өгч чадалгүй жулдаад байгаа юм.
Н.ЧИНЗОРИГ
