Эдийн засаг, хөгжлийн сайд Ч.Хүрэлбаатар шөнө дөлөөр Хятадуудтай уулзаж, архи ууж, мөрийтэй тоглосон гэх мэдээлэл сошиалаар цацагдаад байна. Тэрбээр үүнд өөрийн цахим хуудсаараа дамжуулан хийсэн тайлбартаа үүнийг гүтгэлэг гэжээ.
Түүний тайлбарт "БНХАУ-ын Элчин сайдын яамнаас зохион байгуулсан арга хэмжээнд оролцоод тарахад үүдэнд сэтгүүлч асуулт асуухад нь хариулт өгчихөөд явсны дараа архи ууж, согтуурч, мөрийтэй тоглосон гэсэн гүтгэлэг явуулж эхэлжээ. Хариу өгье:
- Монгол улсын чөлөөт бүсэд хөрөнгө оруулалт хийх сонирхлоо илэрхийлсэн БНХАУ-ын компанийн төлөөлөлтэй өнөөдөр ордонд уулзаж манай улсын эдийн засгийн нөхцөл байдал, хууль эрх зүйн орчин, манай 2 орны хамтын ажиллагааны талаар ярьж санал солилцсон.
- Үүний дараа манай яам дээр Чөлөөт бүстэй холбоотой хууль эрхзүйн орчин, бодлогын талаар албан ёсоор танилцуулга хийж, асуултанд хариулсан байдаг.
- Орой Монгол Улсад суугаа БНХАУ-ын элчин сайдын яамны албаны хүмүүстэй хамт арга хэмжээнд оролцож Монгол улсад хөрөнгө оруулах талаар албан бус яриаг өрнүүлж, Монголоо магтаж, монголчуудаа дөвийлгөж суусан.
- Арга хэмжээнд би 1 цаг 30 орчим минут суухдаа юун архи дарс уух, тоглох, 2 орны хамтын ажиллагаа, айлчлалын талаар санал бодлоо ярьж байлаа.
Ийм л юм болсон. Ингэхэд үүнийг согтуурсан, мөрийтэй тоглосон гэж гүтгэж харлуулах нь арай хэтэрнэ ээ. Намайг муулах ч яах вэ? Муулуулаад, гүтгүүлээд, доромжлуулаад сурчихсан юм. Хөрөнгө оруулагч нараа үргээгээд өндийж байгаа эдийн засгаа хорлочих вий дээ. Энэ АСУ.мн гэдгийг шүүхэд өгнө өө, арай хэтэрч байна. БНХАУ-ын элчин сайдын албаны хүмүүс ихэд гайхаж яагаад ингэж гүтгэж байгааг асууж байна лээ. Шүүхдэнэ ээ л гэл ээ. 2 улсын хооронд сэв суулгах юм болж байна" гэжээ.
Тэгэхээр Ч.Хүрэлбаатар сайдын хэлж буйгаар бол Монголоо магтаж, дөвийлгөсөн гэнэ. Уг нь Хөгжил хариуцсан сайдын хувьд ордны уулзалтаа шөнө дөлөөр албан бус байдлаар үргэлжлүүлэхээс гадна илүү анхаарах ёстой асуудлууд бий.
Хятадуудтай тэгж л их шадар харилцаж чадаад буй юм бол Монголбанк, Хятадын Ардын Банкны хооронд байгуулсан 15 тэрбум юань буюу 5 их наяд төгрөгийн үндэсний мөнгөн тэмдэгт солилцох своп хэлцлийн гэрээний хугацаа 2023 оны долдугаар сарын 1-нд дуусах гэж буйд анхаарч болохгүй юу.
Энэ бол Эдийн засаг, хөгжлийн сайдын ажил үүрэгт хамаатай л сэдэв шүү дээ. Монголбанкнаас өгч буй мэдээллээр, манай талаас своп хэлэлцээний хугацааг дахин сунгах хүсэлтээ өгч, яриа хэлэлцээ хийж байгаа л гэсэн. Гэхдээ шийдэл хоёр улсын төр засгийн түвшинд л гардаг шүү дээ.
Сануулахад, хоёр улсын худалдаа, эдийн засгийн хамтын ажиллагааг дэмжих зорилгоор 2011 онд анх 10 тэрбум юаниар байгуулж байсан уг своп хэлцлийн дүн өнгөрсөн жилүүдэд өсөж, хэд хэдэн ч удаа хугацаа нь сунгагдсан.
Өдгөө своп хэлцлийн гэрээний хугацаа дуусахад сар гаруйн хугацаа үлдээд байна. Бид энэ хугацаанд нэг дор 5 их наяд төгрөгтэй тэнцэх төлбөр төлөх боломжгүй. Хугацаа сунгахгүй бол Төв банк валютын нөөцөөсөө төлөх эрсдэлд орно. Тиймээс ийм чухаг асуудлыг шийдвэрлэхэд анхаарч байх ёстой сайд арай л их завтай яваад байх шиг.
Н.ЧИНЗОРИГ
