Ямар нэг аргаар, яаж ийж байгаад улс төрийн тогоонд, тэрдундаа саарал ордонд багтаж шингээд байж л байвал энэ насных нь зорилго биелээд байгаа мэт хандлагатай хэсэг бүлэг этгээдүүд эрх баригч МАН-д бий. Магадгүй, өнөөдөр гол дүрд тоглоод буй 80-аад оны залуу лидерүүдийн заримынх нь уг санаа ч тэдгээр нөхдөөс ялгарахгүй буюу ижил байж мэднэ л дээ. Ерөөс хувь улстөрч эрх мэдэлд шунан дурлах тусам хувийн эрх ашиг нь эхэнд эрэмбэлэгдсээр байдаг зүй тогтолтой.
Түүнчлэн өдгөө намынхаа даалгавраар гэх тодотголоор сайдын албан хашиж буй нөхдийг харахаар үнэхээр энэ улс орны төлөө хийсэн зүйлсийн намтар гэхээр юм тун багатай хүмүүс олонх нь юм. Тухайлбал, Эрүүл мэндийн сайд С.Чинзоригийн хувьд элдэв ноцтой асуудалд холбогдоод байдаггүй ч гэлээ нэг тийм энийг хийчихье, тэрийг шийдчихье гэсэн улс төрийн эрүүл амбиц багатай мэт харагддаг. Гэсэн мөртлөө улст төрийн тогоонд байж л байх гээд үзээд байдаг дээр дурдагдсан чиглэлийн улстөрч гэх юм уу даа.
Уг нь түүнд улс төрийн тэрдундаа гүйцэтгэх засаглалын түвшинд ажиллаж ирсэн олон жилийн намтар бий. Аль 2004 онд буюу бараг хориод жилийн өмнө “Зөөлөн эх”-ийн Б.Цэрэндэжидийн хэрэг гэж хэвлэлийн хуудаснаа шуугиулж байх үед С.Чинзориг Нийгмийн хамгааллын дэд сайд байсан л даа. Тухайн үед Ши сайдынхаа хамтаар уг асуудалд холбогдоод өнгөрч байсан нь тухайн үеийн хэвлэлүүдийн хуудаснаас харагддаг. Түүнчлэн яамны ажлыг таньж мэдсэн туршлагатай гэгдэх тэрбээр Хөдөлмөр нийгмийн хамгааллын сайдаар ажиллаж байсан бол мөнөөх л туршлагатай гэдгээрээ Эрүүл мэндийн сайдаар өдгөө ажиллаж байна.
С.Чинзориг сайд Эрүүл мэндийн яаманд ирэхээсээ өмнө хэвлэлд ярихдаа “Ерөнхий сайд дуудаж, уулзсан. Өмнө нь сайдын ажил хийж байсан туршлагатай, нөгөө талаар эрүүл мэндийн даатгалын асуудлыг мэддэг хүний хувиар таныг Эрүүл мэндийн сайдад санал болгох саналтай байгаагаа надад хэлсэн. Би бодох хугацаа хэрэгтэй байгаагаа хэлсэн. Одоо цайны цагаар Ерөнхий сайдтай уулзаж, саналаа хэлнэ… Сайд бол улс төрийн албан тушаал. Тиймээс улс төрийн албан тушаалтан очиход болохгүй юмгүй. 2000 оноос хойш эрүүл мэндийн сайдыг салбараас нь томилсон. ГССҮТ, II эмнэлгийн дарга байсан хоёр хүн удирдлаа. Эрүүл мэндийн салбарын шинэчлэл ямар үр дүнд хүрсэн, ажлын хариуцлага, сахилга батыг сайжруулах асуудал байсаар байна. Тэгэхээр Эрүүл мэндийн сайдаар салбарын хүн ажиллах нь үр дүнтэй байдаггүй нь харагдаж байна” гэсэн тайбарыг хэлсэн юм.
Нэг ёсондоо надад туршлага байна, тиймээс би сайд болоход асуудалгүй гэсэн л агуулга л даа, шууд утгаараа бол.
Гол нь ийм тайлбар хэлээд өөрийгөө чадна гээд сайдаар томилогдсон хүнд чадахгүй мэдэхгүй гээд хойшоо суух, шалтаглах эрх байх ёсгүй.
Гэтэл С.Чинзориг Эрүүл мэндийн сайд болсноосоо хойш асуудал бэрхшээл их тоочих боллоо.
Тухайлбал, Эрүүл мэндийн салбарын хүний нөөц, сургалт, цалин хөлсний талаарх мэдээллийг байнгын хороонд танилцуулахдаа, Анхан шатны буюу сумын эрүүл мэндийг төвүүдэд сувилагчдын хэрэгцээ хамгийн өндөр байгаа. Сувилагчдыг нэмэгдүүлэх хэд хэдэн арга хэмжээ авч байгаа ч өргөн цар хүрээтэй болж чадахгүй байна.
Эмчийн хэрэгцээ шаардлага өндөр байгаа. Салбарын төрийн захиргааны төв байгууллага, агентлаг, харьяа газруудын боловсон хүчний томилгоо ихээхэн удаашралтай байгаа нь хүндрэл үүсгэж байна гэхчлэн салбараа баахан муулна лээ. Уг нь салбарынхаа харьяа байгууллагуудыг нэгдсэн удирдлагаар хангахад анхаарах нь сайдад өөрт нь хамаатай асуудал баймаар. Би улс төрийн туршлагатай гэж ирчихээд удирдлагаар хангаж чадахгүй байвал дахиад сайд болох гэж горилох хэрэггүй дээ, С.Чинзориг сайд аа!
Н.ЧИНЗОРИГ
