БШУ-ны сайд Л.Энх-Амгалангийн төрсөн дүү Лувсанцэрэнгийн Ганбаатар 2004 онд ОХУ-ын ДЯЯ-ны Удирдлагын академид удирдлагын менежерийн чиглэлээр 2 жил суралцахаар Боловсролын зээлийн сан буюу тухайн үеийн Сургалтын төрийн сангаас 12 мянган ам.долларын зээл авсан талаар бид өмнө нь мэдээлсэн.
Тэрээр дүүгийнхээ зээлийн асуудлаар "Миний төрсөн дүү юм байна лээ. 2004 онд ОХУ-ын цагдаагийн академид явсан юм байна лээ. Тэгээд би одоо яах вэ. 2004 онд би бизнес эрхлэгч хүн байсан. Манай дүү 12 мянган долларын зээлээр суралцсан. Өнөөдөр Булган аймгийн цагдаагийн дарга хийдэг. Хамгийн гол нь хууль зөрчсөн үү, үгүй юү гэдэг нь чухал" гэх тайлбарыг өгсөн.
Тэгвэл Л.Энх-Амгалан сайдын гэргий Машбатын Сэржмядаг 2005 онд Австралийн Мельбурны их сургуульд хууль эрх зүйн чиглэлээр магистерт 1.5 жил суралцахаар 33.5 мянган ам.долларын зээл авчээ. Зээлийн нөхцөлд "Гэрээнд заасан байгууллагад 5-иас доошгүй жил ажилласан тохиолдолд чөлөөлөх асуудлыг Сургалтын төрийн сангийн удирдах зөвлөлд хүсэлт гарган шийдвэрлүүлнэ. Гэрээний үүргээ зөрчсөн тохиолдолд 3 жилийн дотор зээлийг төлж барагдуулна" гэж заасан.
БСШУ-ны сайдын 2017 оны долдугаар сарын 27-ны өдрийн дугаар А/88 тоот тушаалаар Машбатын Сэржмядагийн Боловсролын зээлийн сангийн зээлийг чөлөөлжээ.
Эх сурвалж: Itoim.mn
