УИХ-ын чуулганы өнөөдрийн /2023.05.19/ хуралдаанаар Үндсэн хуулийн нэмэлт өөрчлөлтийн талаар хэлэлцэж байна.
УИХ-ын гишүүн Т.Доржханд: УИХ-д суудалтай намууд болон суудалгүй намууд энэ асуудлыг 2 жил тойрон ярьсан. Хоёр ч удаа санамж бичиг байгуулж, судлаачдын саналыг сонсож 150-155 гишүүнтэй байхаар ярилцаж 152 гишүүнтэй байж болох юм байна гэсэн. Эхний хэлэлцүүлгийн дараа УИХ-ын гишүүд тойрогтоо ажилласан. Тойрогтоо ажиллах үеэр 152 гишүүн их байна гэдэг санал давамгайлсан. Иргэдийн саналыг хүндэтгэж энэ асуудлыг ярьж байна. УИХ-д суудалтай МАН, АН, ХҮН ярилцаад 126 гишүүнтэй байхыг дэмжсэн.
1992 оны шинэ Үндсэн хуулийг хийж байхад нэг гишүүний төлөөлөх чадвар нь 27 мянган иргэн байсан. Өнөөдөр Монгол Улс 3.4 сая иргэнтэй. Нэг гишүүн 27мянган иргэнийг төлөөлнө гэх юм бол 126 гэдэг тоо гарч ирж байгаа. Ядаж 1992 оны Үндсэн хуулийн төлөөлөх чадварыг буулгахгүй явъя. Авлига, хулгай яагаад үүсэж байна гэхээр парламентын гишүүдийн тоо цөөхөн байна. Хүний тооноос үл хамаарч дэлхийн улс орнууд 120-оос дээш парламентын гишүүнтэй ажиллаж байна. Тийм болохоор гишүүдийн тоог 126 гэдэг тооноос буулгах юм бол энэ өөрчлөлтийг хийх шаардлага байхгүй. Хөгжил яръя гэж байгаа бол өнөөдрийн тогтолцоог өөрчлөх хэрэгтэй. Хоёр дахь, гурав дахь хэлэлцүүлэг дээр дахин тооны асуудал сөхөгдөх юм бол ХҮН хүлээж авахгүй. Ажлын хэсэг дээр 126 гишүүнтэй байх саналыг дэмжиж байгаа.
