Зам тээврийн салбарын хөгжил улс орны хөгжил дэвшилд үлэмж нөлөөтэй гэдгийг хэнбугай ч үгүйсгэх аргагүй. “Зам дагаж хөгжил ирнэ” гэдгийг дэлхий нийтээрээ хүлээн зөвшөөрдөг. Тэгвэл манай тухайд зам тээврийн салбарын өчигдөр, өнөөдрийн нөхцөл байдлыг аваад үзэхэд шүүмж дагуулах зүйл бишгүй. Жилийн жилд дандаа л зээлээр замуудаа “нөхдөг”, хэдэн замын компани дунд нь мөнгөждөг хандлага тогтчихсон. Тэгэхээр салбарын энэ буруу жишиг С.Бямбацогт сайдын удирдлагын үед өөрчлөгдөх үү гээд харахаар найдлага тун бага байгаа юм.
Салбарын сайдын амнаас сүүлийн үед хариуцлага гэж үг их унаж байгаа. Авто замаа хайрлахгүй, гамнахгүй даац хэтрүүлсэн тээвэр хийсэн жолооч, ачаа илгээгч, хүлээн авагчдад хариуцлага тооцно гэхчлэн хэлээд л байгаа. Сайд ийнхүү хариуцлага ярьж, жолооч нарт анхааруулж буй нь сайн хэрэг. Гэхдээ сайдаас хэн хариуцлага нэхэх вэ гэдэг асуулт мэдээж тавигдах ёстой. Үүний тулд С.Бямбацогт сайд нэн тэргүүнд ямар ажлууд хийх шаардлагатай вэ гэдгийг энд сануулъя.
Ингээд аваад үзэхээр нэн тэргүүнд урт настай Дарханы замыг энэ онд бүрэн ашиглалтад оруулах ёстой. Үнэндээ ингэж чадвал сайдаар ирсний чинь хэрэг гарч мэдэх юм. Дарханы зам 2019 оны арваннэгдүгээр сарын 30 гэхэд ашиглалтад орох албан ёсны товлосон хугацаатай байсан билээ. Тэгэхээр товлосон хугацаанаас даруй дөрвөн жил хэтэрсний дөрөвний нэг нь С.Бямбацогт сайдын ажилласан хугацаанд ногдож байна.
Засгийн газрын 2018 оны 284 дүгээр тогтоолын дагуу Улаанбаатар-Дархан-Уул чиглэлийн автозамыг дөрвөн эгнээ бүхий зам болгон өргөтгөх ажил 2019 оны зургаадугаар сарын 17-ны өдрөөс эхэлсэн байдаг. Анх таван сарын хугацаанд багтаагаад барина гэж байсан Дарханы замын ажил хэдэн жилээр дампуурахад цар тахал, хил гааль гээд нөлөөлсөн зүйлс бий ч манай тухайд салбар яамны бодлого, зохицуулалтын оролцоо дутуу гучуу байсан нь холбоотой. Түүнчлэн С.Бямбацогт сайд ажлаа аваад багагүй хугацаа өнгөрсөн ч урт настай замын ажил урагшилж гавихгүй байгаа нь харагдаж буй. Хэдийгээр энэ онд багтаагаад ашиглалтад хүлээгээд авна гэж байгаа ч хүйтэн сэрүүний улирал эхлэхээр ирэх хавар руу шидчих магадлал тун өндөр юм.
Дарханы зам бүрэн ашиглалтад орохгүй олон жил болсны хор хохирлыг нь хэн хүнгүй л үзэж буй. Энэ бол зөвхөн Дархан, Сэлэнгийн иргэдэд хамаатай асуудал биш гэдгийг ч хэвлэлүүд олонтаа сануулан бичдэг. 202,4 км-ийн урттай авто зам барих уг төсөл Улаанбаатар хотын гадна орших Дархан-Эмээлтийн тойрог уулзвараас эхлэх бөгөөд нийт гурван аймаг, зургаан сум, буюу Төв аймгийн Баянчандмань ба Борнуур сум, Сэлэнгэ аймгийн Мандал ба Баянгол сум, Дархан-Уул аймгийн Хонгор сумдын нутгийг дайран өнгөрч, Дархан-Уул аймагт орших Дархан хотын өмнөд хэсэгт төгсөж байгаа. Цаашлаад дотоодын аялал жуулчлалын гол дэд бүтэц болсон зам. Өнгөрсөн жилүүдэд түр зам тавьж аргацааж байсан ч тэр нь стандарт хангаагүйн улмаас олон хүн хохирол үзсэн.
Тэгэхээр С.Бямбацогт сайд байнга л бусдаас хариуцлага нэхэж, манай яам Шинэ сэргэлтийг хэрэгжүүлж байна гэж цээжээ дэлдээд байхаасаа өмнө Дарханы замаа бүрэн ашиглалтад хүлээгээд авчихвал тэр чинь жинхэнэ бодит сэргэлт болно шүү.
Мөн С.Бямбацогт сайдын ажил үүрэгт шууд хамаатай нэг асуудал бол мухар төмөр замуудын хил холболтын асуудлыг шийдвэрлэхэд анхаарах юм. Өнгөрсөн 2022 онд манай улсын төмөр замын сүлжээний урт 2,964.9 км болж 40 хувиар нэмэгдсэн, Тавантолгой-Гашуунсухайт, Зүүнбаян-Ханги, Тавантолгой–Зүүнбаян гэсэн экспортын гурван гарцтай болсон ч хил холболтын төмөр замын ажил хийгдээгүйн улмаас шинэ төмөр замын гарцуудаа бүрэн дүүрэн ашиглаж чадахгүй байгаа юм. Яг л нөгөө Дарханы замын үр ашиг гарахгүй гацаад байгаа шиг. Тэгэхээр С.Бямбацогт сайд Шинэ сэргэлтийн бодлогыг хэрэгжүүлж байгаа гэж ярихаасаа урьтан дээрх хоёр асуудалд анхаарч, ажил хэрэг болгох шаардлагатай байна.
Н.Чинзориг
