Электрон тамхи, түүний дагалдах хэрэгслийг аймгийн хэмжээнд худалдан борлуулахыг хориглосон захирамжийг Дархан-Уул аймаг, Баян-Өлгий зэрэг аймгийн Засаг дарга нар гарган хэрэгжүүлж байсан.
Тэгвэл уг захирамжтай холбогдуулан Шударга өрсөлдөөн хэрэглэгчийн төлөө газраас тус аймгийн Засаг дарга нарт хуулийн хэрэгжилт хангуулах тухай албан бичгийг хүргүүлжээ. Тодруулбал, аймгийн хэмжээнд электрон тамхийг худалдан борлуулахыг хориглосон нь аж ахуйн нэгжийн бизнесийн үйл ажиллагаанд хууль бусаар саад учруулсан, электрон тамхи хэрэглэгчдийн эрхийг зөрчиж байна гэх гомдол Шударга өрсөлдөөн хэрэглэгчийн төлөө газарт ирсний дагуу судалж үзэхэд хэд хэдэн хууль тогтоомжийг зөрчсөн нь тогтоогдсон байна.
Шударга өрсөлдөөн, хэрэглэгчийн төлөө газраас бусад аймгуудад тухайн зөрчлийг давтан гаргуулахгүй байх зорилгоор зөвлөмж хүргүүлсэн гэв.
Шударга өрсөлдөөн, хэрэглэгчийн төлөө газраас 2022 онд электрон тамхийг 21 насанд хүрээгүй хүнд худалдан борлуулахгүй байх чиглэлийг улсын хэмжээнд өгсөн байдаг.
