Газрын тосны бүтээгдэхүүнд үнийн дээд хязгаар тогтоох зэргээр нэмэлт хориг арга хэмжээ авснаас хойш ОХУ-ын эдийн засаг энэ оны эхний улиралд 1.9 хувиар буурчээ.
ОХУ-ын Үндэсний Статистикийн Хорооны зүгээс мэдээлснээр өнгөрөгч нэгдүгээр улиралд тус улсын дотоодын нийт бүтээгдэхүүн (ДНБ) өнгөрсөн оны мөн үетэй харьцуулахад 1.9 хувиар буурсан болохыг Франс Пресс зэрэг гадаадын томоохон мэдээллийн агентлагууд онцолсон байна.
Франс Пресс агентлагийн дүгнэж буйгаар Европын Холбоо болон “Их 7”-гийн бүлэг, Австрали улсууд хамтран Оросын боловсруулсан газрын тосны бүтээгдэхүүнд үнийн дээд хязгаар тавих зэргээр нэмэлт хориг арга хэмжээ авсан явдал нь эдийн засаг ийнхүү агшихад хүрсэн хэмээв.
Олон улсын эрчим хүчний агентлаг ОХУ-ын газрын тосны экспорт өнгөрсөн гуравдугаар сард Украинд дайн дэгдсэнээс хойших хамгийн дээд түвшинд хүрсэн гэж мэдэгдсэн ч өнгөрсөн оны мөн үетэй харьцуулахад 43 хувиар буурсан байна.
Үүнээс гадна, Оросын Сангийн яамны 11-ний өдөр мэдээлснээр, энэ оны 1-р сараас 4-р сар хүртэл газрын тос, байгалийн хий зэрэг эрчим хүчний экспорт өнгөрсөн оны мөн үетэй харьцуулахад 52.3 хувиар буурч, зардал нь 26 хувиар өссөн гэжээ.
Үүний үр дүнд өнгөрөгч нэгдүгээр сараас дөрөвдүгээр сар хүртэл ОХУ-ын төсвийн алдагдал 3,4 их наяд рубльд хүрсэн байна.
Эх сурвалж: YTN
