Фейсбүүк, Инстаграм платформуудын толгой компани болох Мета Их Британи улсын нутаг дэвсгэрт баталгаажсан хэрэглэгчийн тэмдэгтээ үнэлж эхэлжээ.
Баталгаажсан хэрэглэгчийн тэмдэгтийг үнэлэх аргачлал нь Илон Маскийн сэдсэн Твиттерийн аргачлалтай ижил юм. Гэвч Твиттерийн хувьд баталгаажсан хэрэглэгчийн тэмдэгтээ сарын 7.99 ам.доллароор үнэлсэн бол Метагийн зүгээс баталгаажсан хэрэглэгчийн тэмдэгтээ сарын 9.99 паундаар үнэлжээ.
Улмаар Их Британи улсын хэрэглэгчид баталгаажсан хэрэглэгчийн тэмдэгтийг эзэмших хүсвэл өөрсдийн иргэний үнэмлэхийн зургийг хавсаргасан хүсэлтээ явуулах хэрэгтэй гэнэ. Мөн хэрэглэгч 18 болон түүнээс дээш насны хүн байх ёстой ажээ.
Метагийн энэхүү үйлчилгээ нь Их Британиас гадна АНУ, Австрали болон Шинэ Зеланд улсуудад нэвтрээд байгаа юм.
Үйл явдлын хүрээнд Мета компаниас мэдэгдсэнээр хэрэв хэрэглэгч баталгаажсан хэрэглэгчийн тэмдэгт эзэмшвэл, ямарваа нэг асуудал гарсан тохиолдолд чатбот бус үйлчилгээний зөвлөх “бодит хүн”-тэй харьцах боломж нээгдэнэ гэжээ.
Эх сурвалж: BBC
