“Z” үеийнхэний (1990-ээд оны сүүлээс 2010-аад оны эхэн үед төрсөн) бараг тал хувь нь амьдралаа залгуулахын тулд үндсэн ажлынхаа хажуугаар нэмэлт ажил эрхэлдэг болохыг судалгаагаар тогтоожээ. Учир нь дэлхийн дийлэнх улс орнуудад өргөн хэрэглээний бараа бүтээгдэхүүний үнэ асар хурдацтай өсч залуу үеийнхний амьжиргааны өртөгт үзүүлэх дарамт нэмэгдсэнтэй холбоотой хэмээн шинжээчид үзсэн байна.
АНУ-ын CNBC телевиз орон нутгийн цагаар 17-ны өдөр үндэстэн дамнасан зөвлөх компани болох Deloitte-гийн дэлхийн 44 улсын 14483 “Z” үеийнхэн болон 8373 Миллениал үеийн (1980-аад оны эхэн үеэс 1990-ээд оны сүүлч хүртэл төрсөн) дунд явуулсан судалгааны үр дүнд үндэслэн энэ тухай мэдээлэв.
Судалгаанд оролцсон “Z” үеийнхний 46 орчим хувь нь үндсэн ажлынхаа хажуугаар бүтэн болон хагас цагийн ажил хийдэг нь тогтоогджээ. Харин Миллкниалуудын хувьд энэ үзүүлэлт 37 хувьтай гарсан байна. Энэ нь жилийн өмнөхтэй харьцуулахад 3 болон 4 пунктээр тус тус өссөн үзүүлэлт юм.
Ийнхүү нэмэлт ажил хийж буйн гол шалтгаан бол мэдээж санхүүгийн асуудалтай холбоотой. “Z” үеийнхний 38 хувь, Миллениалуудын 46 хувь нь тус тус дээрх хариултыг өгсөн байна. “Шинэ ур чадвар эзэмшиж, танилын хүрээгээ тэлэх” зорилгоор нэмэлт ажил эрхэлдэг гэх хариултыг судалгаанд оролцогчдын 25 болон 28 хувь нь өгсөн бол “хоббигоо дагаж, сэтгэл санаагаа өргөхийн тулд” гэх хариулт өгсөн хүмүүсийн тоо аль аль нь 25 хувьд ч хүрээгүй юм.
Deloitte компанийн тэргүүн Майкл Пармалли "Амьдралаа залгуулахын тулд нэмэлт ажил хийдэг Миллениал болон “Z” үеийнхэн улам олон болох нь тодорхой. Санхүүгийн асуудал энэ үеийнхэнд дарамт болж байна” хэмээн онцлон тэмдэглэв. Тэрээр үргэлжлүүлэн “Эдийн засгийн асуудал нь тэднийг ирээдүйгээ төлөвлөх чадварт нь саад болж, амьдралынхаа чухал шийдвэрүүдийг хойшлуулахаас аргагүй нөхцөл байдалд хүргэж байна” хэмээн нэмж дурджээ.
Миллениал болон “Z” үеийнхний дунд хамгийн эрэлттэй байдаг нэмэлт ажлын байр бол цахим худалдаа, үйлчилгээ болон хоол хүнс хүргэлт, дуудлагын такси үйлчилгээ, түүнчлэн инфлүнсер зэрэг цагт баригддаггүй ажлууд багтаж буй аж. Түүнчлэн амьдралын өртөг нэмэгдсээр буй энэ үед нэмэлт ажил эрхлэхээс гадна хуучин бараа бүтээгдэхүүн хэрэглэх, ирээдүйд үл хөдлөх хөрөнгөд хөрөнгө оруулах зорилгоор хуримтлал үүсгэх зэргээр санхүүгээ төлөвлөдөг нь ажиглагдсан байна.
Эдийн засгийн хэмжээгээрээ тэргүүлэгч орнуудын хувьд ойрын хугацаанд инфляцын түвшин буурах шинж ажиглагдахгүй байгаа юм. Тухайлбал мөн өдөр зарласан Евро бүсийн 20 орны дөрөвдүгээр сарын инфляцын түвшин 7.0 хувь буюу өмнөх сартай харьцуулахад (6.9%) нэмэгдсэн дүр зурагтай байгаа юм. Цалингийн түвшинтэй харьцуулахад үйлчилгээний үнэ болон эрчим хүчний үнийн өсөлт үүнд голлох нөлөөг үзүүлсэн байна. Хүнсний бүтээгдэхүүн, эрчим хүчний үнийг хасч тооцсон суурь инфляц өмнөх сард 7.5 хувь байсан бол энэ сард 7.3 хувь болон буурсан байна. Ингэснээр тус бүс нутгийн инфляцын түвшин Европын Төвбанкны зорилтот түвшин болох хоёр хувиас хол давсаар бараг хоёр жилийн нүүрийг үзэж буй юм.
Эх сурвалж: Hankyung
