Мягмар гарагийн шөнө Оросууд Киев рүү янз бүрийн пуужингаар довтолсон нь сүүлийн үеийн хамгийн хүчтэй цохилтуудын нэг байв. Украины Зэвсэгт хүчний ерөнхий командлагч Валерий Залужный Орос улс агаар, далай, хуурай замын 18 пуужин, мөн Шахед-136, 131 нисгэгчгүй онгоц ашигласан гэж мэдэгдлээ.Киев рүү харвасан пуужингийн дунд хэт авианы "Калибр" пуужингууд байсан гэжээ.
Энэхүү довтолгооны үр дүнгийн талаар Украин, ОХУ-ын Батлан хамгаалах яам өөр хоорондоо зөрчилдсөн мэдэгдэл хийж буй.
Агаарын довтолгооноос хамгаалах ажиллагааны үр дүнд агаарын бүх байг, тэр дундаа зургаан "Х-47М2 Кинжал"" хэт авианы пуужинг устгасан гэж Киев мэдэгдэв.
Украины агаарын довтолгооноос хамгаалах алба өмнө нь 5-р сарын 8-нд нэг "Кинжал"-ыг амжилттай устгасан тухай мэдээлсэн. Киев хотын дарга Виталий Кличко сэтгүүлчдэд пуужингийн хэлтэрхий үзүүлсэн бөгөөд энэ нь шинжээчдийн үзэж байгаагаар "Кинжал"-ын байлдааны хошуу гэжээ.
Зургаан "Кинжал" пуужинг амжилттай устгасан гэдэг нь одоогоор нотлох баримтаар батлагдаагүй байна. Оросын Батлан хамгаалах яам дор хаяж нэг “Кинжал” пуужин ашигласан гэдгээ баталж байгаа.
Түүнчлэн "Оросын цэргүүд Украины Зэвсэгт хүчний ангиудын байршил, сум зэсгийн агуулах болон Барууны орнуудаас нийлүүлсэн зэвсэг, цэргийн техникт алсын тусгалын нарийвчлалтай зэвсгээр цохилт өгсөн" гэж мэдэгдэв. Ингэхдээ бүх байг оносон гэж мэдэгдэж байгаа бөгөөд үүнээс нэг "Кинжал" пуужин АНУ-гаас Украинд нийлүүлсэн агаарын довтолгооноос хамгаалах "Patriot" системийг оносон гэж сайд Сергей Шойгу өөрөө ярьсан байна.
Тэрбээр "Украины командлалын яриад байгаа шиг тийм олон Кинжалыг хөөргөөгүй” гэж РИА Новости агентлагт ярьжээ.
"Patriot" системийн батерей эсвэл түүний хэсэг нь гэмтсэн гэдгийг CNN-ийн нэг эх сурвалж нотолсон бөгөөд уг цогцолбор эвдэрсэн байж магадгүй ч сүйрээгүй гэж мэдэгджээ.
Эх сурвалж: ВВС
