Хятадын зүүн хойд хэсгийн Жилин, Хэйлунцзян мужууд далайн боомтгүйн улмаас тээвэр, логистикийн хувьд хүндрэлтэй байдалд орсоор удаж байгаа билээ. Хонконгийн Минбо сонин 15-ны өдөр Хятадын Гаалийн ерөнхий газрын мэдэгдлийг иш татан мэдээлснээр, эдгээр хоёр муж ирэх 6-р сарын 1-нээс эхлэн Оросын Владивосток боомтыг Хятадын дотоодын боомт болгон ашиглах боломжтой болсон талаар мэдээлжээ.
1858 онд Чин гүрэн, Оросын хаант улсын хооронд байгуулсан тэгш бус гэрээ болох Айхүнгийн гэрээний дагуу Оросын тал өөрийн болгосон Владивосток боомтыг 165 жилийн дараа ийнхүү Хятад улс дахин ашиглах эрхтэй болж буй нь энэ аж. Үүний үр дүнд Хятадын Жилин мужид баригдах Чанчунь-Жилин-Түмэн хотуудыг холбосон бүтээн байгуулалтын төсөл эрчимжих төлөвтэй байна. Түүнчлэн НҮБ-аас Умард Солонгосын эсрэг авсан хориг арга хэмжээний улмаас ашиглах боломжгүй болсон БНАСАУ-ын Ражин боомтоос өөр гарц хайж байгаа Хятад улс хоёрдогч орны боомтыг ашиглаж далайд гарах боломжтой болж буйн зэрэгцээ Алс Дорнодын Хятад болон Орос улсууд бие биетэйгээ нягт харилцаа холбоогоо бэхжүүлэх сайхан боломж гарч байна хэмээн харж болохоор байгаа юм.
Хятадын Гаалийн ерөнхий газрын зүгээс ирэх 6-р сарын 1-ний өдрөөс Оросын Владивосток боомтыг Хятад руу шилжүүлэн ачих боомт болгон ашиглах боломжтой болж байгаа хэмээн мэдэгдлээ.
Өнгөрөгч 4-ний өдөр Хятадын Гаалийн ерөнхий газар 2023 оны 44 тоот тушаалыг өөрийн цахим хуудаснаа нийтэлсэн ба “Зүүн хойд нутгийн хуучин аж үйлдвэрийн баазыг хөгжүүлэх стратегийн арга хэмжээг хэрэгжүүлэхийн сацуу Жилин мужид дотоодын бараа бүтээгдэхүүний хил дамнасан тээвэрлэлтийн хамтын ажиллагаа явуулж буй хилийн боомтуудын ашиглалтыг дэмжих зорилгоор дотоодын худалдааны бараа бүтээгдэхүүнийг хилээр тээвэрлэх бизнесийн хүрээг цаашид өргөжүүлэхээр шийдвэрлэлээ” хэмээн дурдав. Энэ нь ОХУ-ын Владивосток боомтыг ирэх 6-р сарын 1-ний өдрөөс эхлэн Хятадын дотоодын ачааг шилжүүлэн ачих боомтын үүрэгтэйгээр ажиллахаар болсон гэсэн үг юм. Энэхүү шийдвэрийн хүрээнд 1000 орчим километр хуурай газраар тээвэрлэж, Ляонин мужийн Инкоу эсвэл Далянь боомтод очин зүүн өмнөд бүсийн Шиамэнь болон Гуанжоу хотууд руу тээвэрлэдэг одоогийн логистикийн сүлжээтэй харьцуулахад тээврийн зардал хамаагүй багасах төлөвтэй байгаа юм.
Өнгөрсөн оны 2-р сард Украин руу халдан түрэмгийлсэн ОХУ барууны хориг арга хэмжээг даван гарахын тулд дорно зүгт чиглэсэн бодлого баримталснаар Владивосток боомтыг ашиглан Хятад, Оросын худалдааны хэмжээ мэдэгдэхүйц нэмэгдээд байгаа билээ. Хятадын зүүн өмнөд эргээс Владивосток боомт руу гарах ачааны хэмжээ нэмэгдэхийн хэрээр буцах ачааны хөлөг онгоцны тээвэрлэлтийн хүчин чадал ч нэмэгджээ. Өнгөрсөн оны 9-р сард Жилин мужийн Хүнчүнь хотын тэнгисийн цэргийн товчоо Владивосток хотыг дотоодын ачааг шилжүүлэн ачих боомт болгон ашиглах хүсэлтэй байгаагаа засгийн газарт илэрхийлж байсан удаатай юм. БНАСАУ, БНХАУ, ОХУ-тай хиллэдэг Хүнчүнь хот нь Владивосток хотыг 200 орчим километрээр холбосон төмөр зам болон хуурай замтай. Хятад улс Умард Солонгосын Ражин боомт руу чиглэсэн 48 километр замыг тавьсан ч БНАСАУ-ын цөмийн болон пуужингийн бүтээн байгуулалттай холбогдуулан НҮБ хориг арга хэмжээ авсны улмаас Ражин боомтыг хаагаад байгаа юм.
Хятадын эдийн засгийн салбарын мэдээллээр дагнан ажилладаг Кайшин сонины 14-ний өдөр мэдээлснээр, хэрвээ Хятад улс Владивосток боомтыг ашиглаж эхэлвэл ложистикийн зардлыг бууруулахаас гадна Бээжингийн ойролцоох Шанхайгуаны төмөр замын архаг гацаа багасаж, нүүрс зэрэг задгай ачааны тээвэрлэлт ихээхэн сайжирна гэж мэдээлсэн байна. Түүнчлэн Хятадын Зүүн хойд бүс нутаг болон Оросын Алс Дорнодын хоорондох аж үйлдвэрийн сүлжээ, нийлүүлэлтийн хэлхээг бэхжүүлэхэд сайнаар нөлөөлнө гэж үзжээ.
Энэ нь БНХАУ-ын дарга Ши Жиньпин, ОХУ-ын ерөнхийлөгч Владимир Путин нарын өнгөрөгч 3-р сард Москва хотноо үзэглэсэн “2030 он хүртэлх Хятад-Оросын эдийн засгийн хамтын ажиллагааны гол чиглэлийн талаарх хамтарсан мэдэгдэл"-ийн нэг хэсэг болж буй аж. Тухайн үед хоёр орны төрийн тэргүүнүүд “бүс нутгийн болон хил орчмын хамтын ажиллагааны нөөц бололцоогоо улам дээшлүүлж, бодит үр нөлөөг нэмэгдүүлж, Хятадын зүүн хойд бүс нутаг болон Оросын Алс Дорнод дахь харилцан ашигтай хамтын ажиллагааг хөгжүүлэх" тухай мэдэгдэж байсан юм.
Үүний дагуу энэ оны эхээр ОХУ-ын Владивосток хотын дарга болон БНХАУ-ын Жилин мужийн амбан нар төмөр зам болон хуурай замын ачаа тээврийн цар хүрээг өргөтгөх гэрээнд гарын үсэг зурсан талаар Хонконгийн Минбо сонин 15-ны өдөр мэдээлэв. Түүнчлэн Амар мөрний эрэг дээрх Дальнереченск хотоос Хятадын Хармөрөн мужийн Хулин хотод байгалийн хий нийлүүлэх гэрээг ОХУ соёрхон батлаад байгаа билээ. Өнгөрөгч 11-ний өдөр Хятадаас Владивосток хотод суугаа ерөнхий консул Пиао Янфан нь Хармөрөн мужийн Худалдааны газрын орлогч дарга Хэ Сүнтэй уулзаж, хоёр бүс нутгийн харилцаа хамтын ажиллагааг гүнзгийрүүлж, хамтын хөгжлийг идэвхтэй дэмжинэ гэдгээ мэдэгдэв.
Ийнхүү Хятадын тал Владивостокийн боомтыг ашиглах боломжтой болсноор өмнө нь Хятадын нутаг дэвсгэр байсан Оросын Алс Дорнодын түүхийг эргэн санагалзахад хүргэв. Оросын Номхон далайн флотын командлал байрладаг, жилдээ 1 сая 20 футын чингэлэг тээвэрлэдэг Оросын хамгийн том боомт Владивостокийг Чин гүрний үеийн цэргийн жанжин Жилиний харьяанд байдаг Далайн харуул гэж нэрлэдэг байв. 1858 онд Чин гүрэн Амар мөрний зааг дахь Айхүн гэдэг газар Оросын хаант улстай гэрээ байгуулж, зүүн хойд зүгийн 1.1 сая хавтгай дөрвөлжин километр газрыг чөлөөлсөн аж. Харин ОХУ энэхүү газрын нэрийг Владивосток болгон өөрчилсөн нь "Дорно дахиныг байлдан дагуулах" гэсэн утгатай юм.
Гоминданы засгийн газрыг Тайвань руу хөөж, Бүгд Найрамдах Хятад Ард Улсыг байгуулсан Мао Зэдун Чин гүрний байгуулсан тэгш бус гэрээг хүлээн зөвшөөрөөгүй ч коммунист дэглэмтэй ЗХУ-д энэ огт хамаагүй байсан юм. 1991 оны 5-р сарын 16-нд БНХАУ болон ЗХУ “Хятад-Зөвлөлтийн хилийн зүүн хэсгийн яриа хэлэлцээ"-г хийж байсан бол 2001 онд "Хятад-Оросын найрамдал хамтын ажиллагааны гэрээ"-нд гарын үсэг зурж, хоёр тал хоёул газар нутгийн ямар нэгэн маргаан байхгүй” гэж мэдэгдэж хилээ тогтоож байв. 2004 онд БНХАУ-ын тал Хятад-Оросыг холбосон 4300 километр хилийг бүхэлд нь албан ёсоор баталсан юм.
Гэвч Хятадын ард түмэн одоог хэр нь Орост хүчээр нэгтгэсэн Владивосток зэрэг газар нутгаа эргүүлэн авах бодолто байдгаа нуудаггүй. Хятадын эрх баригчдын зүгээс гаргасан албан ёсны газрын зурагт Владивостокийг “Хэ-Чамви” гэх Хятад нэршилийг нь зүүлт болгон оруулсан байдаг бол Тайваний эрх баригчдын гаргасан газрын зурагт ч мөн “Хэ-Чамви” гэх зүүлт оруулсан байдаг байна.
Эх сурвалж: JoongAng
