Оросууд Украинд бүрэн хэмжээний цэргийн довтолгоо хийсний 446 дахь өдөр Оросын цэргүүд эзлэгдсэн суурин газруудыг хяналтандаа байлгахыг хичээсээр байгаа ч Украины зэвсэгт хүчин, орон нутгийн хамгаалалтын ангиуд түрэмгийллийг эсэргүүцсээр байна хэмээн DW мэдээлэв. НҮБ-ын мэдээлснээр Украины 16 сая гаруй иргэн гэр орноо орхин дүрвэжээ.
Украины Ерөнхийлөгч В.Зеленский ХБНГУ-д Европын хамгийн нэр хүндтэй Калагийн шагнал гардуулах ёслолд 5 дугаар сарын 14-нд өөрийн биеэр хүрэлцэн иржээ. Тэрээр ХБНГУ-ын канцлер Олаф Шольцын хамт Украины Зэвсэгт хүчний цэргийн албан хаагчид бэлтгэгдэж буй Аахен дахь цэргийн баазад зочиллоо. Хоёр улсын удирдагч сургалтын явцтай танилцаж, Украины цэргийн албан хаагчдын ашиглаж байгаа, цэргийн техник хэрэгслийг үзсэн байна. Зеленский дайчдад III зэргийн "Эр зоригийн төлөө" одон гардуулав.
В.Зеленский дайчдад хандан "Эх орноо төлөөлөн энд бэлтгэгдэж байгаа та бүхэнд баярлалаа гэж хэлмээр байна. Би өнөөдөр Канцлертай ярилцлаа. Манай Зэвсэгт хүчнийг хүндэтгэж байгаагаа илэрхийлсэн. Та бүхнийг бид гэртээ хүлээж байна, армиа тулалдааны талбарт улам хүчирхэг болгоорой." хэмээн хэлээд Украины Зэвсэгт хүчний цэргийн албан хаагчдыг сургах ажиллагаанд дэмжлэг үзүүлсэн канцлер Олаф Шольцод талархал илэрхийлэв.
