Өмнөд Африкт суугаа АНУ-ын элчин сайд тус улс Украины дайнд төвийг сахисан байр сууриа илэрхийлсэн ч Орост зэвсэг нийлүүлж байна хэмээн буруутгав.
Элчин сайд Рубен Бригетийн өгүүлж буйгаар 2022 оны арванхоёрдугаар сард Кейптауны ойролцоох тэнгисийн цэргийн баазад түр саатсан Оросын ачааны хөлөг онгоц буцахдаа зэвсэг, сум тээвэрлэсэн гэдгийг тогтоосон гэлээ.
Тэгвэл ӨАБНУ-ын Ерөнхийлөгч Сирил Рамафосагийн ажлын алба дээрх мэдээллийн үгүйсгэн, зэвсэг тээвэрлэсэн гэх ямар ч нотлох баримт олдоогүй гэж мэдэгдэв. Мөн тус улс Украины дайны асуудалд төвийг сахисан байр сууриа хадгалсаар ирсэн гэдгийг онцоллоо. Гэхдээ зэвсгийн наймаатай холбоотой асуудлыг судлах хараат бус мөрдөн байцаалтын ажиллагаа эхлүүлэхээ зарласан юм.
Оросын далбаатай "Lady R" ачааны хөлөг өнгөрсөн оны арванхоёрдугаар сард Кейптаун хотын ойролцоох Саймон Таун дахь тэнгисийн цэргийн баазад зангуугаа буулгасан нь олон эргэлзээ таамаг дагуулж байв. Учир нь ачааны хөлөг онгоцууд тэнгисийн цэргийн баазад биш, Кейптаун хотын иргэний боомтод зогсдог.
Тухайн үед Өмнөд Африкийн парламентын гишүүн, сүүдрийн Батлан хамгаалахын сайд Кобус Марайс мэдэгдэл хийж шөнийн цагаар Оросын хөлөгт ачаа буулгаж байгаа асуудлаар Засгийн газраас тайлбар шаардаж байсан билээ.
