Оросын төрийн өмчит газрын тосны Транснефть компанийн зүгээс мэдэгдсэнээр тус улсын Украины хилээр дайран өнгөрч буй газрын тос дамжуулах хоолойд халдлага болсон талаар онцолжээ.
Тодруулбал тус компани мөн өдөр Оросын баруун хэсэгт орших Брянск муж дахь "Дружба" газрын тос дамжуулах хоолойн байгууламж халдлагад өртсөн хэмээн мэдэгдсэнийг Ройтерс болон ТАСС агентлагууд дурдсан байна. Азаар хүний амь нас эрсдээгүй ч энэ удаагийн хэрэг явдал бол гарцаагүй террорист халдлага байсан гэв.
Үүний өмнөхөн Teлеграм платформ дахь Оросын хэвлэл мэдээллийн Baza агентлаг “Дружба" газрын тос дамжуулах хоолойд холбогдсон гурван хоосон агуулах халдлагад өртсөн бөгөөд газрын тостой холбоотой ямар нэгэн хохирол амссан гэх дүр зураг одоогоор ажиглагдаагүй гэв.
"Дружба” хоолой нь Беларусь улсаар дамжин Польш, Герман, Унгар, Словак руу дамждаг хуурай газрын хоолой бөгөөд өнгөрсөн жил ОХУ Украинд халдан түрэмгийлснээс хойш хэд хэдэн халдлагад өртөж байсан удаатай.
Өнгөрсөн оны арваннэгдүгээр сард Беларусийн хилийн ойролцоох цахилгаан станц пуужингийн дайралтад өртсөний дараа "Дружба" хоолойгоор дамжуулан газрын тосны нийлүүлэлт түр хугацаагаар тасарч байв. Түүнчлэн өнгөрөгч гуравдугаар сард Брянск мужид газрын тос дамжуулах хоолойн шахах станц нисгэгчгүй нисэх төхөөрөмжийн халдлагад өртөж байсан билээ.
Эх сурвалж: JoongAng
