Хар тамхи Монголын нийгэмд бодит аюул, занал учруулах болсоор нэлээд жилийн нүүрийг үзлээ. Саяхан л бид мансууруулах бодисыг Монголчуудаас алс хол, зах зээл ч байхгүй гэж төөрөгдөж явах зуур өсвөр үе, залуус энэ төрлийн гэмт хэргийн золиос болж, статистикийн муруй өдөр бүр дээшилсээр байна. Ялангуяа өвсөнд мансуурсан урлагийнхан хар тамхинд өөрсдийгөө дүрж, ял сонсох боловч, ээлж нэгээр өршөөгдөж суллагдсаар сүүлдээ “Нүүр өгөхөөр, бөгс өгнө” гэдэг шиг болж байна.
Тухайлбал, хоёр сарын өмнө Flash хамталгийн дуучин Бэбэ олон нийтийн газар хар тамхи хэрэглэж, хууль хяналтын байгууллагад шалгагджээ. Гэтэл хэрэг нь одоог хүртэл прокурор луу шилжээгүй, хууль хяналтын байгууллагаас хэргийн талаар тодорхой хариу мэдэгдээгүй байгаа гэнэ. Цаашлаад ял завших, хэргээс мултрах арга зам сүвэгчилж байж болзошгүй гэдэг хардлага төрүүлээд байна.
Нийгмийн үлгэр дуурайлал болох ёстой залуу уран бүтээлчид энэ мэт хар тамхины хэрэгт холбогдож, хүүхэд, залууст сөрөг хандлага бий болгож байна. Тэдний удаа дараагийн эдгээр үйлдэл өсвөр наснынхны хар тамхи хэрэглэх, сонирхох нэгэн том шалтгаан болсоор. Гэтэл хууль хяналтынхнаас мултарч, хариуцлага хүлээлгүй үлдэх нь нийгэмд бүр ч том нөлөө үүсгэж байгаа юм. Тэгвэл Flash хамтлагийн дуучин Бэбэ олон нийтийн газар хар тамхи хэрэглэсэн гэх хэрэг хэрхэн шийдвэрлэгдэх эсэх нь тун эргэлзээтэй байна.
