Вьетнам улсад түүхэндээ хамгийн халуун буюу Цельсийн 44 градус давсан халуун тохиож байна. Гэхдээ цаг уурчид урьд хожид байгаагүй энэ халууныг удаан үргэлжлэхгүй гэж таамаглаж байна.
Хаууны энэ дээд амжилтыг тус улсын хойд нутгийн Тхань Хоа мужид тогтоосон бөгөөд эрх баригчид өдрийн хамгийн халуун цагт хүмүүсийг гэртээ байхыг уриалсан байна.
Бүс нутгийн бусад орнуудад ч хэт халуун цаг агаар ажиглагдаж байна. Тайландын эрх баригчид баруун зүгийн Мак мужид 44.6 хэм хүрч дээд амжилт тогтоосон тухай мэдээлжээ.
Бирмийн хэвлэл мэдээллийн хэрэгслүүд тус улсын зүүн хэсгийн нэгэн хотод агаарын температур 43.8 хэмд хүрсэн нь сүүлийн 10 жилийн хамгийн өндөр температур болсон гэж мэдээлэв.
Ханойд уур амьсгалын өөрчлөлтийн мэргэжилтэн Нгуен Нгок Хуи Франс Пресс агентлагт ярихдаа уур амьсгалын өөрчлөлт, дэлхийн дулаарлын нөхцөлд Вьетнамд тохиож буй хэт халалт санаа зовоож байна гэжээ.
Тэрээр энэ мэт уур амьсгалын рекордууд цаашид олон удаа тохиож магадгүй гэж үзэж байна. Энэ нь цаг уурын загварчлалын үр дүн үнэн зөв болохыг нотолж байна" гэж эрдэмтэн хэлэв.
Вьетнамын Да Нанг хотын тариачин Нгуен Ти Лан AFP агентлагт хэлэхдээ хэт халууны улмаас ажилчид ердийнхөөсөө эрт ажлаа эхэлж, өглөөний 10 цаг гэхэд дуусгахаас өөр аргагүй байдалд хүргэж байна гэжээ.
Тодотгоход, Вьетнамд үүнээс өмнө бүртгэгдсэн хамгийн их халуун дөрвөн жилийн өмнө тус улсын төвийн Ха Тинь мужид 43.4 градус хүрч халж байжээ.
Халуун зөвхөн Зүүн өмнөд Азийн орнуудад тохиож буй биш. Тухайлбал, Бангладешийн нийслэл Дака хотод 1960-аад оноос хойших хамгийн халуун температур бүртгэгдсэн бол хөрш Энэтхэгийн эрх баригчид тус улсын зарим хэсэгт агаарын хэм хэвийн хэмжээнээс 3-4 градусаар илүү байгааг мэдээлжээ.
Түүнчлэн Испанид 4-р сарын хамгийн өндөр температур /38.8 хэм/ тус улсын өмнөд хэсэгт орших Кордоба нисэх онгоцны буудалд бүртгэгдсэн.
Аж үйлдвэрийн эрин үе эхэлснээс хойш дэлхийн цаг агаар 1.1 градусаар дулаарсан бөгөөд улс орнууд утааг эрс бууруулахгүй бол агаарын температур өссөөр байх болно.
Дэлхийн агаарын температур 1.5 хэмээс дээш өсөхөөс сэргийлэх арга хэмжээ авахаар засгийн газрууд өмнө нь тохиролцсон. Гэвч эх дэлхий маань аль хэдийн 1.1 градусаар дулаарсан бөгөөд одоо 2030-аад онд дэлхийн дундаж температурын өсөлт 1.5 градусаас давж магадгүй гэж мэргэжилтнүүд хэлж байна.
Жилийн дундаж температур нэмэгдэх бүр дэлхийн дулаарлын сөрөг нөлөөллийг нэмэгдүүлнэ гэж НҮБ-ын Уур амьсгалын өөрчлөлтийн Засгийн газар хоорондын комисс тайландаа дурджээ.
Эх сурвалж: ВВС
